Душанбе, 26 март, – АИ «Корвон Иттилоот». Театри давлатии академии опера ва балети ба номи С. Айнӣ бори аввал дар таърихи худ соҳиби рояли консертии нави Steinway & Sons модели D-274 мегардад. Ин асбоб дар доираи лоиҳаи Мактаби фортепиании русӣ ба театр тақдим гардид.

Пайдо шудани чунин рояли сатҳи ҷаҳонӣ дар Душанбе рӯйдоди муҳими фарҳангӣ арзёбӣ мешавад. То имрӯз набудани чунин асбоб имкониятҳои баргузории консертҳои сатҳи баландро маҳдуд мекард.

Акнун интизор меравад, ки пойтахт бештар мизбони ҳунармандони сатҳи байналмилалӣ гардад.

22 майи соли 2026 дар Душанбе консерти муаррифии ин роял баргузор мешавад. Дар он сафирони лоиҳа — Даниил Харитонов, Мария Варакина, Тимофей Владимиров ва Аксинья Потемкина иштирок мекунанд.

Ин консерт аввалин барномаи як силсила баромадҳои солона хоҳад буд.

Продюсери генералии лоиҳа Табриз Шахиди таъкид кард, ки акнун имкониятҳои нави рушди барномаҳои мусиқӣ дар Тоҷикистон фароҳам шудаанд.

Директори театр Камолиддин Сайфиддинзода ин рӯйдодро таърихӣ номида, қайд намуд, ки он пурра бо ташаббуси хусусӣ амалӣ гардид.

Коршиносон бар онанд, ки чунин иқдом ба ҳамгироии фарҳангии Тоҷикистон бо фазои ҷаҳонӣ мусоидат мекунад.

Консерти мазкур инчунин ба ҷашни солгарди Толибхона Шахиди бахшида мешавад.

АКС: Театри давлатии академии опера ва балети ба номи С. Айнӣ