Душанбе, 28 феврал, – АИ «Корвон Иттилоот». Дар санаи 26 феврали соли 2026 аъзои клуби экожурналистон ва эковолонтёрон сафари таълимӣ ба хоҷагии ниҳолпарварӣ назди Кумитаи ҳифзи муҳити зисти назди Ҳукумати Ҷумҳурии Тоҷикистон дар шаҳри Ваҳдат анҷом доданд. Ҳадафи сафари мазкур шиносоӣ бо фаъолияти хоҷагӣ, равандҳои парвариш ва нигоҳубини ниҳолҳо ва омӯхтани усулҳои муосири тарбияи экологӣ ва ҳифзи захираҳои табиӣ буд.

Дар ҷараёни экскурсия иштирокдорон бо ташкил ва равандҳои кори хоҷагӣ шинос шуданд: омодасозии хок, кишти тухм, шинондани ниҳолҳо ва нигоҳубини дарахтони навпарвар. Ҳамчунин маълум гардид, ки хоҷагии ниҳолпарварӣ дар соли 2025 дар масоҳати 5 гектар таъсис ёфта, имрӯз дар он беш аз 25 000 ниҳол аз намудҳои гуногун парвариш мешавад.

Таваҷҷуҳи махсус ба гуногунрангии растаниҳо зоҳир гардид: дар хоҷагӣ зиёда аз 15 намуди дарахтони ороишӣ ва сояафкан парвариш мешаванд, ки барои сабзкорию ободонии шаҳрҳо ва ноҳияҳо пешбинӣ шудаанд. Аъзои клуб бо усулҳои муосири муҳофизати растаниҳо аз касалу зараррасонҳо, системаи обёрӣ ва ғизодиҳӣ ва технологияи суръатбахшии афзоиши ниҳолҳо шинос шуданд.

Раиси хоҷагии ниҳолпарварӣ таъкид намуд, ки ин база дар тайёр намудани ниҳолҳо барои маъракаҳои шинонидани дарахт, ки ба беҳбуди вазъи экологӣ равона шудаанд, нақши калидӣ дорад. Ниҳолҳои парваришшуда барои ободонӣ ва сабзгардонии кӯчаву боғҳо, майдончаҳои истироҳат ва ҷойҳои ҷамъиятӣ дар шаҳрҳо ва ноҳияҳои Тоҷикистон истифода мешаванд, ки ба афзоиши майдонҳои сабз ва ҳифзи гуногунии биологӣ мусоидат мекунад.

Иштирокдорон арзиши таълимии чорабинӣ ва нақши он дар ташаккули дониши экологӣ, ҳавасмандии ҷавонон ба ҳифзи муҳити зист ва иштироки фаъолона дар ташаббусҳои экологии маҳалиро таъкид намуданд. Дар охир онҳо омодагии худро барои паҳн кардани донишҳои гирифташуда дар байни ҷомеаҳои худ ва иштирок дар маъракаҳои ояндаи сабзгардонӣ ва ҳифзи табиат баён карданд.

Манбаи акс: Акс аз хадамоти матбуоти Кумитаи ҳифзи муҳити зисти назди Ҳукумати Ҷумҳурии Тоҷикистон