Душанбе, 14 январ, – АИ «Корвон Иттилоот». Соли 2026 дар Иттиҳоди Давлатҳои Мустақил расман Соли ҳифзи тандурустӣ эълон шуд. Қарори дахлдор ҳанӯз 14 октябри соли 2022 аз ҷониби Шӯрои сарони давлатҳои ИДМ қабул гардида буд, аммо имрӯз ин ташаббус дар пасманзари чолишҳои глобалии демографӣ, эпидемиологӣ ва иҷтимоию иқтисодӣ аҳамияти махсус пайдо мекунад.
Тавре Кумитаи иҷроияи ИДМ хабар медиҳад, таҷрибаи эълон намудани солҳои мавзӯӣ дар кишварҳои Иттиҳод аз соли 1999 амалӣ гардида, ба мутамарказ намудани талошҳои муштараки давлатҳои иштирокчӣ дар соҳаи гуманитарӣ равона шудааст. Ин равиш имкон медиҳад, ки барномаҳои ҳамоҳангшуда ва нақшаҳои фарогири байнидавлатӣ амалӣ карда шаванд.
Интихоби ҳифзи тандурустӣ ҳамчун мавзӯи асосии соли 2026 бозгӯи он аст, ки саломатии аҳолӣ яке аз унсурҳои калидии амнияти миллӣ, рушди устувор ва суботи иҷтимоӣ ба шумор меравад. Дар сиёсати миллӣ афзалиятҳо ба баланд бардоштани давомнокии умр, коҳиши фавт ва маъюбият, беҳтар намудани дастрасӣ ва сифати хизматрасонии тиббӣ, инчунин риояи ҳуқуқҳои шаҳрвандон дар соҳаи тандурустӣ равона шудаанд.
Дар доираи омодагӣ ба Соли ҳифзи тандурустӣ коршиносони кишварҳои ИДМ Нақшаи мукаммали чорабиниҳоро таҳия намуданд, ки тақрибан 100 тадбирро дар 10 самти асосӣ дар бар мегирад. Ин ҳуҷҷат такмили заминаи меъёрӣ-ҳуқуқӣ дар соҳаи тандурустӣ, густариши ҳамкорӣ бо Созмони умумиҷаҳонии тандурустӣ, рушди пешгирии бемориҳои ғайрисироятӣ ва тақвияти ёрии аввалияи тиббию санитариро пешбинӣ мекунад.
Таваҷҷуҳи хос ба ҷорӣ намудани роҳҳалҳои инноватсионӣ ва рақамӣ равона гардидааст. Аз ҷумла, рушди телемедицина, истифодаи технологияҳои зеҳни сунъӣ, таҳлили маълумоти калон дар низоми тандурустӣ ва таъмини некӯаҳволии санитарӣ-эпидемиологии аҳолӣ аз ҷумлаи самтҳои муҳими нақша ба шумор мераванд.
Илова бар ин, баргузории таҳқиқоти муштараки илмӣ, конфронсу форумҳои байналмилалӣ, омодасозӣ ва такмили ихтисоси кадрҳои тиббӣ, татбиқи барномаҳои таълимӣ ва дастгирии тарзи ҳаёти солим низ дар маркази таваҷҷуҳ қарор доранд.
Интизор меравад, ки гузаронидани Соли ҳифзи тандурустӣ ба таҳкими ҳамкории давлатҳои ИДМ, мубодилаи таҷрибаи пешқадам ва баланд бардоштани сифати хизматрасонии тиббӣ дар фазои Иттиҳод мусоидат намояд.
Акс: Кумитаи иҷроияи ИДМ