Душанбе, 19 декабр, 2025 – АИ «Корвон Иттилоот». Тоҷикистон пайваста сиёсати гузариш ба манбаъҳои барқароршавандаи неруи барқ ва диверсификатсияи энергетикиро тақвият медиҳад. Соли 2026 дар ҷумҳурӣ ду неругоҳи барқи офтобӣ бо иқтидори умумии 500 мегаватт — ҳар кадом 250 мегаватт дар вилояти Суғд ва вилояти Хатлон — мавриди истифода қарор мегиранд.

Дар ин бора Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар Паём ба Маҷлиси Олии Ҷумҳурии Тоҷикистон изҳор доштанд.

Айни ҳол корҳои лоиҳавии сохтмони ҳар ду неругоҳ оғоз гардидаанд. Тибқи нақша, иншоотҳо то моҳи августи соли 2026 пурра ба истифода супорида мешаванд.

Сарвари давлат таъкид намуданд, ки ин иқдом бахше аз стратегияи бузурги энергетикии кишвар мебошад.

«Мо тасмим гирифтаем, ки дар давоми ду соли оянда бо ҷалби сармояи мустақим якчанд неругоҳи барқи офтобиро бо иқтидори умумии 1500 мегаватт ба истифода диҳем», — иброз доштанд Пешвои миллат.

Президенти мамлакат Ҳукумати ҷумҳурӣ, бахусус Вазорати энергетика ва захираҳои об-ро вазифадор намуданд, ки ҳамкориро бо сармоягузорони ватанӣ ва хориҷӣ тақвият бахшида, барои татбиқи саривақтии лоиҳаҳои офтобӣ тадбирҳои фаврӣ андешанд.

Ин раванд нишон медиҳад, ки рушди энергетикаи офтобӣ ҳамчун самти муҳими ҷалби сармоя арзёбӣ мегардад.

Тоҷикистон, ки дорои захираҳои бузурги гидроэнергетикӣ мебошад, тадриҷан низоми мукаммали энергетикаи «сабз»-ро ташаккул медиҳад. Ба гуфтаи Сарвари давлат, кишвар имконият дорад марказҳои бузурги ҳисоббарории зеҳни сунъиро бо неруи барқи тоза ва оби хунук таъмин намояд.

Ин омил мавқеи Тоҷикистонро ҳамчун макони ҷолиб барои лоиҳаҳои рақамӣ ва технологияи баланд таҳким мебахшад. Ҳамзамон таъкид шуд, ки рушди иқтидорҳои нав бояд бо истифодаи сарфакоронаи неруи барқ ҳамоҳанг бошад.

«Барои қонеъ намудани талаботи рӯзафзуни соҳаҳои иқтисодию иҷтимоии кишвар бо неруи барқи доимӣ ва устувор, дар баробари бунёди иқтидори нави истеҳсолӣ, истифодаи оқилонаи неруи барқ нақши калидӣ дорад», — зикр намуданд Пешвои миллат.

Тибқи таҳлилҳо, талабот ба неруи барқ дар дохили кишвар то соли 2030 нисбат ба соли 2025 31 фоиз афзоиш меёбад, ки рушди манбаъҳои алтернативиро ба масъалаи стратегӣ табдил медиҳад.

Ба истифода додани неругоҳҳои офтобӣ дар Суғд ва Хатлон қадами ҷиддӣ дар роҳи таъмини амнияти энергетикӣ, рушди устувори иқтисод ва ҳифзи муҳити зист хоҳад буд. Ин лоиҳаҳо иродаи Тоҷикистонро барои ҳамоҳанг шудан бо равандҳои ҷаҳонии гузариш ба иқтисоди «сабз» бозгӯ мекунанд.

АКС: Вазорати энергетика ва захираҳои об. Неругоҳи офтобии иқтидораш 3 мегаватт бо низоми захиракунии энергия ба ҳаҷми 0,5 МВт дар ноҳияи Шуғнони Вилояти Мухт