ОСТОНА, 01 январ АИ «Караван Инфо». Дар Қазоқистон маҷмӯи маводи иттилоотӣ барои волидон, ки дар доираи лоиҳаи Фонди LEGO оид ба дастгирии волидон таҳия шудааст, нашр шудааст. Онҳо марҳилаҳои асосии камолоти кӯдаконро — аз таваллуд то 17-солагӣ фаро мегиранд ва тавсияҳои амалӣ оид ба ҳифзи саломатӣ ва рушди ҳамоҳангро дар бар мегиранд.

Маводҳо ба рушди барвақтӣ, хоб, эмкунӣ ва нигоҳубини кӯдакони то 3-сола, инчунин ғизои дуруст, синамаконӣ, ҷорӣ намудани ғизои иловагӣ, фаъолияти ҷисмонӣ ва ташаккули одатҳои муфид дар синни хурдсолӣ бахшида шудаанд. Бахши алоҳида ба волидони кӯдакон ва наврасони 5-17 сола равона намуда шудааст ва мавзӯъҳои солимии равонӣ, ғизои солим, кам намудани истеъмоли шакар ва намак ва истифодаи оқилонаи гаҷетҳоро дар бар мегирад.

Маводҳои иттилоотӣ ҳам барои волидон ва ҳам мутахассисони кӯмаки аввалия тарҳрезӣ шудаанд ва дар ташкили муколамаи возеҳ ва пайваста бо оилаҳо кӯмак мерасонанд. Онҳо аз ҷониби дафтари кишвари СУТ дар Қазоқистон дар якҷоягӣ бо Вазорати тандурустӣ дар асоси тавсияҳои СУТ омода намуда шудаанд. Нашри умумии он 540 ҳазор нусхаро ташкил медиҳад, ки ба тамоми минтақаҳои кишвар фиристода мешавад.

Аксҳо: СУТ