Душанбе, 13 декабр, 2025г. – АИ «Корвон Иттилоот». Тоҷикистону Чин ҳамкориҳоро дар бахши истифодаи захираҳои об, амнияти экологӣ ва технологияҳои муосири тозакунии об тақвият медиҳанд. Ин мавзӯъҳо дар мулоқоти намояндаи Академияи миллии илмҳои Тоҷикистон Фарҳод Кодирзода бо директори генералии Гурӯҳи рушди хоҷагии оби вилояти Шэнсии Чин дар шаҳри Сиан баррасӣ гардиданд.

Дар ҷараёни мулоқот ҷонибҳо ҳолати кунунии ҳамкориро баррасӣ карда, роҳҳои васеъ намудани онро муайян намуданд. Аз ҷумла, масъалаҳои зерин мавриди таваҷҷуҳ қарор гирифтанд:

• иштироки мутахассисони тоҷик дар Намоишгоҳи байналмилалии технология ва таҷҳизоти тозакунии об;
• таҳияи лоиҳаҳои муштараки илмӣ-тадқиқотӣ;
• омӯзиш ва истифодаи таҷрибаи пешрафтаи Чин дар соҳаи тозакунии об ва ҳифзи муҳити зист.

Фарҳод Кодирзода таъкид намуд, ки идоракунии дурусти захираҳои об барои Тоҷикистон аҳамияти стратегӣ дорад, зеро гидроэнергетика ва кишоварзӣ ба самаранокии истифодаи об сахт вобастаанд.

Ҷониби Чин омодагии худро барои мубодилаи таҷриба дар бахши технологияҳои нави филтратсия, мониторинги рақамии объектҳои обӣ ва усулҳои барқарорсозии экологии маҷмӯӣ изҳор дошт.

Ҳамзамон, дурнамоҳои амалисозии барномаҳои муштарак оид ба тозакунии оби нӯшокӣ, рушди таҳқиқоти лабораторӣ ва ташкили мубодилаи мустақими илмӣ миёни мутахассисони ду кишвар баррасӣ шуданд.

Ҳифзи муҳити зист ва идоракунии захираҳои об яке аз самтҳои муҳими ҳамкории Тоҷикистону Чин ба шумор меравад. Созишҳои нав ба таҳкими ҳамкории илмӣ-техникӣ мусоидат намуда, барои ташкили лоиҳаҳои дарозмуддат замина фароҳам меоранд.

АКС: Академияи миллии илмҳои Тоҷикистон