Душанбе, 20 март, – АИ «Корвон Иттилоот». Дар пойтахти Тоҷикистон барномаи густурдаи идона бахшида ба Ҷашни байналмилалии Наврӯз оғоз мегардад. Аз 19 то 28 март боғҳои фарҳангӣ-фароғатии Душанбе ба макони асосии баргузории чорабиниҳои фарҳангӣ, сайёҳӣ ва фароғатӣ табдил ёфта, сокинону меҳмонони шаҳрро гирди анъанаҳои бостонӣ муттаҳид менамоянд.

Ба иттилои шуъбаи иттилооти дастгоҳи Раиси шаҳр, силсилаи чорабиниҳо қариб тамоми мавзеъҳои муҳими ҷамъиятии пойтахтро фаро мегирад. Рӯзи 19 март барномаҳои фарҳангӣ дар боғҳои «Фирдавсӣ» ва «Хайём» оғози расмии ҷашнҳоро таъмин хоҳанд кард.

Рӯзи 22 март яке аз рӯзҳои асосии ҷашн маҳсуб меёбад. Аз соати 17:00 чорабиниҳо ҳамзамон дар боғҳои «Фирдавсӣ», ба номи Садриддин Айнӣ, майдони кӯчаи Сино, инчунин дар мавзеъҳои «Кӯли ҷавонон» ва «Куруши Кабир» баргузор мегарданд. Ҳамзамон, дар боғи «Ирам» аз соати 14:00 то 19:00 Фестивали байналмилалии сайёҳии «Наврӯз — мероси фарҳангӣ ва сайёҳии ҷаҳон — 2026» доир мешавад, ки барои муаррифии имкониятҳои сайёҳии кишвар аҳамияти хос дорад.

Чорабиниҳои идона аз 23 то 28 март идома ёфта, ҳар рӯз бо барномаҳои рангини фарҳангӣ дар ҳамин мавзеъҳо сурат мегиранд. Рӯзи 24 март дар майдони «800-солагии Москва» низ барномаи алоҳидаи фарҳангӣ баргузор мешавад.

Ба гуфтаи масъулон, дар ин рӯзҳо ҳунармандон, аҳли фарҳанг ва сокинони ноҳияҳои пойтахт дар барномаҳои консертӣ, намоишҳои ҳунарӣ, чорабиниҳои фароғатӣ, сайругашт ва экскурсияҳои оммавӣ фаъолона иштирок мекунанд.

Омодагиҳои пойтахт ба Наврӯз низ васеъ ба роҳ монда шудаанд. Дар Душанбе боғҳо, хиёбонҳо ва кӯчаҳо бо гулҳои рангоранг, дарахтони сояафкан ва унсурҳои ороишии рамзии баҳору Наврӯз зиннат дода шудаанд. Имрӯзҳо сокинону меҳмонон аз фазои идонаи шаҳр баҳра мебаранд.

Наврӯз барои мардуми тоҷик на танҳо як ҷашни тақвимӣ, балки як арзиши муҳими миллӣ мебошад. Ин ҷашн дар тӯли асрҳо ҳамқадами забони модарӣ ҳифз гардида, имрӯз ҳамчун рамзи ҳувияти миллӣ ва ифтихори маънавӣ арзёбӣ мегардад. Бо фарорасии баҳор дар ҳар хонадон шодиву сурур эҳсос шуда, кишоварзон бо умед ба ҳосили фаровон тухми умед мекоранд.

Ба ин тартиб, ҷашнҳои Наврӯз дар пойтахт фаротар аз як чорабинии фарҳангӣ буда, ҷузъи муҳими сиёсати давлатӣ дар самти ҳифзи мероси фарҳангии ғайримоддӣ ва рушди сайёҳии дохилӣ ба ҳисоб мераванд.

Акс: Хадамоти матбуоти Президенти Ҷумҳурии Тоҷикистон