Душанбе, 08 декабр, – АИ «Корвон Иттилоот». Ташаббуси Ҷумҳурии Тоҷикистон оид ба тақвияти ҳифзи гиенаи рахдор — яке аз намудҳои нодиру камшумор — дар сатҳи байналмилалӣ пуштибонии васеъ пайдо кард. Дар ин бора маркази матбуоти Кумитаи ҳифзи муҳити зисти назди Ҳукумати Ҷумҳурии Тоҷикистон хабар дод.

Дар шаҳри Самарқанд Конфронси 20-уми Конвенсияи CITES оид ба танзими тиҷорати байналмилалии ҳайвоноту набототи зери хатари нобудшавӣ идома дорад. Дар кори он намояндагони беш аз 130 кишвар, созмонҳои байналмилалӣ ва коршиносони пешбари соҳаи экология иштирок мекунанд.

Дар конфронс масъалаҳои ҳифзи гуногунии биологӣ, танзими савдои байналмилалии намудҳои нодир, мубориза бо қочоқбарӣ ва густариши ҳамкории илмии байналмилалӣ баррасӣ мешаванд. Тоҷикистон низ фаъолона дар ин баҳсҳо иштирок намуда, ташаббусҳои муҳими экологӣ пешниҳод кард.

27 ноябр бо ташаббуси Кумитаи ҳифзи муҳити зист ҷаласаи махсуси пленарӣ баргузор шуд, ки ба вазъи муҳофизат ва барномаи ҳифзи гиенаи рахдор бахшида шуд. Дар он маълумоти илмӣ оид ба коҳиши шумораи ин намуди нодир, таҳдид ба муҳити зисти он ва зарурати таҳкими ҳамкории байналмилалӣ пешниҳод гардид.

4 декабр пешниҳодоти Тоҷикистон дар ҷаласаи COP-20 расман қабул шуд. Тибқи он гиенаи рахдор аз Замимаи III ба Замимаи II — сатҳи баландтари ҳифз – интиқол ёфт.

Ин қарор имкон медиҳад, ки:

• назорати байналмилалӣ аз болои савдои ҳайвон ва узвҳои он шадидтар гардад;
• имкониятҳои мониторинги ҷаҳонӣ ва таҳқиқоти илмӣ васеъ шаванд;
• ҳамоҳангсозии байналмилалии барномаҳои ҳифз ва барқарорсозии намуд тақвият ёбад;
• чораҳои зидди қочоқбарӣ пурзӯр карда шаванд;
• кишварҳо барои ҳифзи ин навъ тадбирҳои иловагӣ андешанд.

Экоcистемаҳои Осиёи Марказӣ ба нобудшавии як қатор намудҳои нодир осебпазиранд. Гиенаи рахдор дар Тоҷикистон хеле кам дучор мешавад ва ба назорати доимӣ, ҳифзи роҳҳои муҳоҷират ва нигоҳдории муҳити табиии зист ниёз дорад.

Ташаббуси Тоҷикистон саривақтӣ ва мувофиқ ба сиёсати экологӣ ва рушди устувори кишвар арзёбӣ гардид ва нуфузи байналмилалии давлатро дар самти ҳифзи табиат боз ҳам таҳким бахшид.

Акс: Кумитаи ҳифзи муҳити зисти назди Ҳукумати Ҷумҳурии Тоҷикистон