Душанбе, 18 ноябр, – АИ «Корвон Иттилоот». Дар намоишгоҳи бузурги байналмилалии сайёҳӣ World Travel Market 2025, ки дар Лондон баргузор мегардад, Тоҷикистон баҳои баланди байналмилалӣ гирифт. Намояндагони кишвар дипломи нашрияи маъруфи сайёҳии Lonely Planet-ро дарёфт карданд, ки Тоҷикистонро ба рӯйхати 25 самти беҳтарини сайёҳӣ барои соли 2026 ворид намудааст.

Ин иқдоми муҳим нишон медиҳад, ки таваҷҷуҳ ба Тоҷикистон ҳамчун яке аз самтҳои босуръат рушдёбандаи сайёҳии экологӣ, фарҳангӣ ва моҷаромез дар Осиёи Марказӣ пайваста меафзояд.

Коршиносони Lonely Planet зикр мекунанд, ки манзараҳои нодири табиӣ, меҳмондории гарму самимӣ ва мероси ғании фарҳангӣ омилҳое мебошанд, ки Тоҷикистонро барои сайёҳони солҳои оянда ҷолибу умедбахш мегардонанд.

Ҳузури кишвар дар World Travel Market 2025 ҳамчунин имкони муаррифии бренди миллии сайёҳӣ, роҳҳои нави сайёҳӣ, лоиҳаҳои сармоягузорӣ ва густариши ҳамкорӣ бо ширкатҳои байналмилалии соҳа гардид.

Гирифтани чунин эътирофи баланд мавқеи Тоҷикистонро дар харитаи ҷаҳонии сайёҳӣ боз ҳам мустаҳкам намуда, имкониятҳои иловагӣ барои рушди инфрасохтори дохилӣ, ҷалби сармоя ва афзоиши ҷараёни сайёҳони хориҷӣ фароҳам меорад.

АКС: Кумитаи рушди туризми назди Ҳукумати Ҷумҳурии Тоҷикистон