Душанбе, 02 март, – АИ «Корвон Иттилоот». Сафорати Ҷумҳурии Тоҷикистон дар шаҳри Теҳрон бо нашри як изҳороти изтирорӣ ба шаҳрвандони худ, ки дар Ҷумҳурии Исломии Эрон қарор доранд, тавсия дод, ки «бо истифода аз имкониятҳои дастрас кишварро тарк намоянд». Дипломатҳо ҳамзамон даъват карданд, ки эҳтиёткор бошанд, аз ҳузур дар наздикии иншооти низомӣ ва давлатӣ худдорӣ варзанд ва аз аксбардорию наворгирӣ парҳез намоянд.

Дар сафорат таъкид гардид, ки намояндагии дипломатӣ фаъолияти худро дар реҷаи муқаррарӣ идома дода, омода аст барои ҳалли масъалаҳои марбут ба хуруҷи шаҳрвандон аз Ҷумҳурии Исломии Эрон мусоидат намояд. Барои иртиботи изтирорӣ як қатор рақамҳои тамос пешниҳод шудаанд: +98 (021) 22 29 95 84, +98 (021) 22 83 46 50, +98 936 325 31 47, +98 910 451 98 15, +98 937 974 35 08, +98 930 433 42 34.

Тавсияҳои ниҳоди дипломатӣ ба замони бадшавии шадиди вазъ дар минтақа рост меоянд. Дар пайи ҳамлаҳои ахири Иёлоти Муттаҳидаи Амрико ва Давлати Исроил ба Ҷумҳурии Исломии Эрон ва басташавии фазои ҳавоии ин кишвар, тамоми парвозҳои мустақим миёни Тоҷикистон ва Эрон лағв гардиданд. Аз ҷумла, парвози ширкати ҳавопаймоии «Вориш», ки мебоист аз Теҳрон ба Душанбе анҷом дода шавад, бекор карда шуд.

Ҳамчунин субҳи 28 феврал ҳавопаймое, ки аз шаҳри Душанбе ба шаҳри Дубай (Амороти Муттаҳидаи Араб) парвоз мекард, маҷбур шуд дар наздикии марзи Туркманистон масири худро тағйир дода, тавассути Покистон ба пойтахти Тоҷикистон баргардад. Сабаб — зарбаҳои ҷавобии Эрон ба пойгоҳҳои амрикоӣ ва маҳдудиятҳои фазои ҳавоии Амороти Муттаҳидаи Араб арзёбӣ мешавад.

Коршиносон ҳушдор медиҳанд, ки ташдиди танишҳо дар Ховари Миёна метавонад барои шаҳрвандони кишварҳои дигар, ки дар минтақа қарор доранд, паёмадҳои ҷиддӣ дошта бошад. Маҳдудияти парвозҳо, афзоиши фаъолиятҳои низомӣ ва мураккабшавии вазъи дипломатӣ хавфҳоро барои мусофирон зиёд намуда, эҳтиёткории бештарро талаб мекунад.

Тавсияҳои дипломатӣ зарурати ҳифзи оромӣ, пайгирии мунтазами иттилои расмӣ ва ҳамоҳангсозии амалҳо бо сафоратро таъкид менамоянд, то хатари эҳтимолӣ ба ҷониву саломатии шаҳрвандони Тоҷикистон дар хориҷ аз кишвар ба ҳадди ақал расонда шавад.

АКС: Сафорати Ҷумҳурии Тоҷикистон дар Ҷумҳурии Исломии Эрон