Душанбе, 23 феврал, – АИ «Корвон Иттилоот». Бори аввал дар таърихи Тоҷикистони мустақил кишвар дар яке аз бонуфузтарин майдонҳои мӯди ҷаҳон — New York Fashion Week муаррифӣ гардид. Дар подиуми Манҳеттен номи Тоҷикистонро тарроҳ Нафиса Имранова бо бренди худ ZHIWJ муаррифӣ намуд.

Ин на танҳо муваффақияти шахсии як тарроҳ, балки қадами рамзӣ барои тамоми саноати эҷодии кишвар буд — изҳороти фарҳангие, ки нишон дод: Тоҷикистон метавонад бо забони мӯди ҷаҳонӣ сухан гӯяд ва ҳамзамон ҳувияти худро ҳифз намояд.

Пас аз парвози душвор аз Душанбе ба Ню-Йорк, Нафиса қариб фурсати истироҳат надошт. 14 феврал шиносоӣ бо иштирокчиён баргузор гардид: дар доираи платформаи Flying Solo дар намоиш 53 тарроҳ аз тақрибан 23 кишвар ширкат варзиданд.

Нафиса эътироф мекунад, ки масъулиятро амиқ эҳсос мекард. Бренди ӯ бояд дар миёни даҳҳо номҳои байналмилалӣ таваҷҷуҳро ҷалб намуда, дар хотирҳо мемонд.

«Ман хеле ҳаяҷон доштам. Вале вақте дар анҷоми намоиш ба подиум баромадам, кафкӯбиҳо то расидан ба охири саҳна ва бозгашт қатъ намешуданд», — мегӯяд тарроҳ.

Ба гуфтаи ӯ, ин кафкӯбиҳои расмӣ набуданд — эҳсоси зинда дар толор эҳсос мешуд.

Пас аз намоиш Нафиса бо тамошобинон мулоқот кард. Аз ҳама бештар омезиши нақшҳои шарқӣ бо унсурҳои эко-пӯст диққат ҷалб намуд.

Имрӯз дар бозорҳои Аврупо ва Амрико истифодаи маводҳои устувор ва экологӣ ба равияи асосӣ табдил ёфтааст.

«Ҳоло дар Аврупо ва Ғарб истифодаи эко-пӯст бисёр муд шудааст. Барои ман муҳим буд, ки ба ин равия рост омадам», — мегӯяд ӯ.

Ду сол пеш Нафиса таҳлили бозори мӯдро омӯхта буд. Ин дониш ба ӯ имкон дод, ки пеш аз баромадан ба подиуми амрикоӣ таҳлили амиқи бозор анҷом диҳад ва коллексияеро интихоб намояд, ки ба талаботи аудитория ҷавобгӯ бошад.

Ӯ аз қолаби маъмулӣ — ки Осиёи Марказиро танҳо бо адрас мепайвандад — берун рафт. Нақшҳои миллӣ аз эко-пӯст бурида шуда, бо таъсири 3D ҳаҷмнок гардонида шуданд. Омезиши органза, шифон ва пӯст ба коллексия ҳамзамон ҷасорат ва сабукӣ бахшид.

Коллексия чор минтақаи кишварро таҷассум кард: Душанбе, Хуҷанд, Помир ва Кӯлоб. Ҳар як образ барои бозори амрикоӣ мутобиқ гардонида шуда, аммо рамзҳои фарҳангиро ҳифз намуд.

Дар қисмати бахшида ба Помир мӯйбофҳои дароз, нақшҳои кӯҳӣ ва унсурҳои ҳаҷмнок, ки аз табиати минтақа илҳом гирифта буданд, пешниҳод гардиданд. Кафшҳое, ки аз ҷӯробҳои анъанавии помирӣ сохта шуданд, таваҷҷуҳи махсусро ба худ ҷалб карданд.

«Ин як навъ “бомба” буд. Ҳар нафари сеюм мепурсид, ки ин чӣ техника аст ва чӣ гуна иҷро шудааст», — мегӯяд Нафиса.

Бо вуҷуди таҷрибаҳои эҷодӣ, Нафиса ДНК бренди ZHIWJ-ро нигоҳ дошт — апсайклинг ва ресайклинг. Дар коллексия матоъҳои қадима истифода шуданд, ки ҳаёти нав гирифтанд.

«Ман ба матоъҳои қадима ҳаёти нав бахшидам. Ин ҳамқадами замон будан ва дастгирии муҳити зист аст», — таъкид мекунад ӯ.

Дар шароите ки рушди устувор ба меъёри асосии саноат табдил меёбад, чунин равиш на танҳо тамоюл, балки принсипи касбӣ мебошад.

Иштироки Нафиса Имронова дар New York Fashion Week бо дастгирии сарпарасти генералӣ AN Group як изҳороти муҳими фарҳангӣ гардид.

Ин баромади танҳо як бренд набуд — ин баромади Тоҷикистон буд. Душанбе, Хуҷанд, Помир ва Кӯлоб дар зарби Манҳеттен ҳамчун қисматҳои як достони муосири миллӣ садо доданд.

Тоҷикистон нишон дод, ки метавонад анъанаро ҳифз намуда, ҳамзамон иштирокчии фаъоли муколамаи ҷаҳонии эҷодӣ бошад.

Манбаи акс: пешниҳодшуда аз ҷониби Нафиса Имронова