Душанбе, 11 ноябр, – АИ «Корвон Иттилоот». Маҷаллаи бонуфузи байналмилалӣ The Investor, ки дар беш аз 48 кишвари ҷаҳон паҳн мегардад ва зиёда аз 165 ҳазор роҳбарону сармоягузорони дорои дороии умумии беш аз 60 миллиард доллари ИМА онро мутолиа мекунанд, шумораи махсуси худро таҳти унвони «The Investor Tajikistan 2025» ба Ҷумҳурии Тоҷикистон бахшид.

Ин лоиҳа дар ҳамкорӣ бо Кумитаи давлатии сармоягузорӣ ва идораи амволи давлатии Ҷумҳурии Тоҷикистон ва Корхонаи воҳиди давлатии «Тоджинвест» омода шудааст. Маҷалла таҳлили амиқи иқтисоди Тоҷикистон, ислоҳоти сохторӣ ва дурнамои рушди сармоягузории кишварро дар бар мегирад.

Маҷалла бо суханони Пешвои миллат, муҳтарам Эмомалӣ Раҳмон, оғоз меёбад, ки дар он самти стратегӣ ва дидгоҳи дарозмуддати давлат муайян шудааст: «Ҳадафи стратегӣ ва дурнамои мо — табдил додани Тоҷикистон ба кишвари боз ҳам мусоиду умедбахш барои сармоягузорӣ, ки барои ҳамкории дарозмуддат ва рушди устувор омода аст».

Дар шумора ҳамчунин суханронии Раиси шаҳри Душанбе ҷой дода шудааст, ки дар он таъкид мегардад: «Имрӯз Душанбе яке аз самтҳои умедбахш ва ҷолиби сармоягузорӣ дар Осиёи Марказӣ гардидааст. Субот, неруи ҷавонон ва стратегияҳои равшани рушд ба ҳар як сармоягузорӣ на танҳо барои пешрафти пойтахт, балки барои ояндаи тамоми Тоҷикистон мусоидат менамояд».

Матолиби ин шумора мусоҳибаҳои вижа бо масъулони давлатӣ, намояндагони бахши хусусӣ ва шарикони байналмилалиро фаро гирифта, равандҳои ислоҳот, устувории иқтисодӣ ва болоравии мақоми минтақавии Тоҷикистонро инъикос мекунанд.

Таҳлилҳои маҷалла соҳаҳои асосии иқтисоди кишвар — аз энергетика ва саноат то кишоварзӣ, инфрасохтор, молия ва навовариро дар бар мегиранд.

Муаллиф ва ташаббускори нашр Beyond Investments Group мебошад — ширкати машваратӣ ва нашриётии байналмилалӣ бо беш аз 20 соли таҷриба дар бозорҳои нав. Маркази идораи он дар шаҳри Париж ҷойгир буда, шохаҳо дар Дубай, Лондон, Ню-Йорк ва Шанхай фаъолият доранд.

Нашрияи асосии гурӯҳ — The Investor — минбари ҷаҳонии робитаи мустақими байни ҳукуматҳо ва сармоягузорон ба ҳисоб меравад. Ҳар шумораи маҷалла бо теъдоди зиёда аз 84 ҳазор нусха чоп шуда, дар фазои рақамӣ то як миллион хонанда пайдо мекунад.

Нашри «The Investor Tajikistan 2025» як қадами таърихӣ дар муаррифии байналмилалии Тоҷикистон маҳсуб меёбад. Он кишварро ҳамчун иқтисоди устувор, навовар ва кушода барои ҳамкорӣ ва сармоягузорӣ дар маркази Осиёи Марказӣ нишон медиҳад.

АКС: аз манбаъҳои боз