Душанбе, 04 сентябр, – АИ «Корвон Иттилоот».  Тоҷикистон лоиҳаи муҳимеро амалӣ мекунад, ки ба пайвастшавии мустақими шабакаҳои телекоммуникатсионии кишвар бо Чин равона шудааст. Ҳадафи асосӣ — беҳтар кардани суръат ва арзиши интернет дар кишвар.

То имрӯз 108 километр хатҳои оптикии баландсуръат ва симчубҳо дар ноҳияҳои Шамсиддини Шоҳин ва Дарвоз насб шудаанд. Ин иқдом имкон медиҳад, ки иқтидори канали интернет афзояд, арзиши хидматҳо барои сокинон поён ояд ва операторони мобилӣ тарифҳои дастрастар пешниҳод кунанд.

Бахтовар Абдусаторров, муовини аввали директори генералии «Тоҷиктелеком», гуфт, ки татбиқи лоиҳа нақши калидӣ дар беҳтар кардани дастрасӣ ва сифати интернет хоҳад дошт.

Муҳандис Шеравган Холзода афзуд, ки ноқилҳои 48-қабата аз Душанбе то Хоруғ кашида шудаанд ва дар марҳилаи оянда хат ба сарҳади Чин идома меёбад. Ин пайвастшавӣ дастрасӣ ба шабакаҳои ҷаҳонии интернетро бо суръати баланд ва арзиши дастрастар таъмин мекунад.

Сокинони Тоҷикистон ҳанӯз ҳам аз нархи баланд ва сифати пасти интернет шикоят мекунанд. Бино ба раддабандии «Global Relocate» барои соли 2024, Тоҷикистон дар байни 238 кишвар ҷойи 142-умро ишғол мекунад. Арзиши миёнаи 1 ГБ интернет дар кишвар 1,65 долларро ташкил медиҳад.

Ин лоиҳа умедворӣ медиҳад, ки бо афзудани иқтидори шабака ва пайвастшавии мустақими байналмилалӣ, Тоҷикистон дар оянда интернети босифаттар ва дастрастар ба истифодабарандагон пешниҳод хоҳад кард.

АКС: Азия плюс