Душанбе, 18 ноябр, – АИ «Корвон Иттилоот». Кумитаи ҳифзи муҳити зист назди Ҳукумати Ҷумҳурии Тоҷикистон лоиҳаи Қонунномаи нави экологиро таҳия кардааст, ки ҳадафаш тақвияти заминаи қонунгузорӣ дар соҳаи ҳифзи табиат ва истифодаи оқилонаи захираҳои табиӣ мебошад.

Лоиҳаи Қонуннома аз ду қисм — умумӣ ва махсус — иборат буда, 40 боб ва 570 моддаро дар бар мегирад. Таҳияи он ба такмил додани қонунгузории экологӣ ва таъмини амалӣ шудани нақшаҳои стратегӣ равона шудааст, аз ҷумла:

• Стратегияи миллии рушди Ҷумҳурии Тоҷикистон то соли 2030,
• Барномаи миёнамӯҳлати рушди кишвар барои солҳои 2021–2025,
• Барномаи давлатии экологӣ барои солҳои 2023–2028,
• Консепсияи сиёсати ҳуқуқӣ барои солҳои 2018–2028.

Ба гуфтаи намояндагони кумита, лоиҳа бар асоси қонунгузории амалкунандаи соҳаи ҳифзи муҳити зист ва бо иштироки мутахассисони соҳа ва ҳуқуқшиносон таҳия шудааст. Дар ин раванд таҳлили санадҳои меъёрии ҳуқуқии кишвар, таҷрибаи байналмилалӣ ва амалияи мақомоти ваколатдор низ ба назар гирифта шудааст.

Қонунномаи нав маҷмӯи муносибатҳои ҳуқуқиро, ки ба ҳифзи муҳити зист ва истифодаи оқилонаи захираҳои табиӣ марбутанд, танзим мекунад ва заминаи ҳуқуқиро барои рушди устувор ва ҳифзи экосистемаҳои кишвар фароҳам меоварад.

Лоиҳаи Қонуннома барои баррасӣ ва муҳокима ба доираи васеи ҷонибҳои манфиатдор пешниҳод шудааст: мақомоти давлатӣ, ташкилотҳои байналмилалӣ, иттиҳодияҳои ҷамъиятӣ, муассисаҳои илмӣ ва ҳам шахсони воқеӣ ва ҳуқуқӣ.

Ба гуфтаи коршиносон, татбиқи Қонунномаи экологии нав қадами муҳими таъмини ҳамзистии ҷомеа ва табиат буда, риояи стандартҳои экологиро ва истифодаи оқилонаи потенсиали табиии Тоҷикистон таъмин менамояд.

АКС: Кумитаи ҳифзи муҳити зист назди Ҳукумати Ҷумҳурии Тоҷикистон