Душанбе, 04 сентябр, – АИ «Корвон Иттилоот». Дар шаҳри Душанбе маҷлиси тантанавӣ ба ифтихори Рӯзи авиатсияи шаҳрвандии Ҷумҳурии Тоҷикистон баргузор гардид.
Ветеранҳо ва мутахассисон зикр карданд, ки дар тӯли солҳои Истиқлоли давлатӣ бо пуштибонии Президенти кишвар, Пешвои миллат муҳтарам Эмомалӣ Раҳмон соҳаи авиатсияи шаҳрвандӣ ба яке аз бахшҳои муҳим ва афзалиятноки иқтисоди миллӣ табдил ёфт.
Директори Агентии авиатсияи шаҳрвандӣ назди Ҳукумати Ҷумҳурии Тоҷикистон Хабибулло Назарзода кормандон ва мутахассисони соҳаи авиатсияро бо иди касбӣ табрик намуда, нақши авиатсияро дар рушди иқтисоди миллӣ муҳим арзёбӣ кард ва аз барномаҳои густариши ҷуғрофияи парвозҳо, афзоиши хатсайрҳои байналмилалӣ ва таҳкими ҳамкорӣ бо кишварҳои хориҷӣ сухан гуфт.
Айни ҳол дар Тоҷикистон чор фурудгоҳи байналмилалӣ — «Душанбе», «Хуҷанд», «Кӯлоб» ва «Бохтар», ду ширкати ҳавопаймоӣ — «Tajik Air» ва «Somon Air», инчунин Корхонаи воҳиди давлатии «Тоҷикэронавигация» фаъолият доранд. Дар солҳои охир инфрасохтори фурудгоҳҳо рушд ёфта, воситаҳои иртибот, дастгоҳҳои роҳнамоӣ ва системаи назорати парвозҳо такмил дода шуда, амнияти парвозҳо боз ҳам тақвият ёфтааст.
Бо дарназардошти аҳамияти соҳа, соли 2017 Агентии авиатсияи шаҳрвандӣ ҳамчун сохтори мустақили марказӣ таъсис ёфт, ки фаъолияти худро бар асоси стандартҳои байналмилалии ИКАО ва қонунгузории миллӣ ба роҳ мемонад.
Сарчашмаи авиатсияи Тоҷикистон ба 3 сентябри соли 1924 бармегардад, вақте ки ҳавопаймои аввалин Ю-13 таҳти идораи Рашидбек Ахриев ва Пётр Комаров хатсайри Бухоро – Душанбе-ро анҷом дод.
– 1927 – оғози парвозҳои мунтазам дар хатсайри Тошканд – Самарқанд – Тирмиз – Душанбе.
– 1930 – таъсиси нахустин фурудгоҳ дар Душанбе ва кушодашавии хатсайрҳои нав тавассути Помир.
– 1931-1932 – фаъол гардидани фурудгоҳҳо дар Кӯлоб, Ғарм, Панҷ ва Данғара ва оғози парвозҳо ба Хоруғ.
– 1937 – таъсиси Идораи ҳудудии авиатсияи шаҳрвандии Тоҷикистон.
– 1940–1990 – авиатсияи шаҳрвандии Тоҷикистон яке аз мавқеъҳои пешсафро дар ҳайати «Аэрофлот»-и СССР ишғол намуд.
– 1949 – таъсиси ширкати давлатии ҳавопаймоии «Тоҷикистон», ки имрӯз бо номи «Tajik Air» машҳур аст.
Бо қарори соли 1994, 3 сентябр расман ҳамчун Рӯзи авиатсияи шаҳрвандии Ҷумҳурии Тоҷикистон ҷорӣ гардид.
Дар анҷоми маҷлис чанде аз собиқадорон ва мутахассисоне, ки дар рушди авиатсияи миллӣ саҳми назаррас гузоштаанд, бо медалҳо ва ифтихорномаҳо сарфароз гардонида шуданд.
Коршиносон зикр мекунанд, ки авиатсияи шаҳрвандии Тоҷикистон на танҳо вилоятҳои кишварро бо ҷаҳон мепайвандад, балки воситаи муҳим барои ҳамгироӣ ба фазои иқтисодӣ ва фарҳангии байналмилалӣ ба шумор меравад.
Акс: аз бойгониҳои Ғафур Шерматов
23 декабри соли 1959 дар аэродроми Душанбе барои аввалин бор ҳавопаймои Ил-18 фуруд омад. Дар акс аз бойгонӣ ҳайати экипажи лайнерии Идораи ҳавопаймоии граждании Тоҷикистон тасвир ёфтааст. Дар маркази кадр – фармондеҳи ҳавопаймо М. Юсупов.