Душанбе, 18 март, – АИ «Корвон Иттилоот». Ҳукумати Тоҷикистон созишномаҳои қаблан баимзорасидаи ҳамкорӣ миёни вилояти Хатлон ва се минтақаи Федератсияи Русия — вилояти Ленинград, вилояти Киров ва вилояти Пенза-ро тасдиқ намуд.
Қарорҳои дахлдор аз ҷониби Президенти кишвар Эмомали Раҳмон дар охири моҳи феврали соли 2026 ба имзо расиданд.
Тибқи санадҳо, ҳамкорӣ соҳаҳои гуногун — тиҷорату иқтисод, илму техника, иҷтимоию фарҳангӣ ва гуманитариро дар бар мегирад. Ин равиш нишон медиҳад, ки ҷонибҳо барои густариши ҳамкории фарогир ва дарозмуддат талош доранд.
Созишнома миёни мақомоти иҷроияи ҳокимияти давлатии вилояти Хатлон ва ҳукумати вилояти Ленинград 24 июни соли 2025 дар Санкт-Петербург ба имзо расида, санади ҳамкорӣ бо вилояти Киров 17 марти ҳамон сол дар Москва имзо шудааст.
Ҳамзамон, Ҳукумати Тоҷикистон лоиҳаи созишнома бо вилояти Пенза-ро низ ҷонибдорӣ намуд. Пас аз анҷоми расмиёти дохилӣ, ба раиси вилояти Хатлон супориш дода шудааст, ки онро ба имзо расонад. Сана ва макони имзои санад тавассути Вазорати корҳои хориҷии Тоҷикистон бо ҷониби Русия мувофиқа карда мешавад.
Ҳадафи асосии ин санадҳо густариши робитаҳои иқтисодии хориҷӣ, рушди тиҷорат, ҳамкории илмию техникӣ ва таҳкими робитаҳои фарҳангиву гуманитарӣ мебошад. Барои татбиқи онҳо мақомоти иҷроия якҷо бо вазорату идораҳои соҳавӣ вазифадор шудаанд чораҳои заруриро андешанд.
Дар ҳамин ҳол, омор нишон медиҳад, ки ҳамкории иқтисодӣ миёни Тоҷикистон ва Русия рӯ ба афзоиш дорад. Тибқи маълумоти гумрукӣ, ҳаҷми гардиши мол дар соли 2025 тақрибан 2,47 миллиард долларро ташкил дода, нисбат ба соли 2024 (1,98 миллиард доллар) тақрибан 25 фоиз зиёд шудааст.
Ба назари коршиносон, тавсеаи ҳамкории байниминтақавӣ метавонад барои ҷалби сармоягузорӣ, тавсеаи бозорҳо ва мубодилаи технологияҳо заминаи мусоид фароҳам оварад.
Ҳамин тариқ, тасдиқи созишномаҳо марҳилаи нави таҳкими шарикии стратегии миёни Тоҷикистон ва Русия ба шумор меравад, ки дар он нақши минтақаҳо рӯз ба рӯз бештар мегардад.
ФОТО: lenobl.ru