Душанбе, 23 апрел — АА «Караван Инфо».Дар ҳошияи ҷаласаҳои баҳории Гурӯҳи Бонки Ҷаҳонӣ ва Сандуқи Байналмилалии Пул дар Вашингтон мулоқоти Муовини аввали Сарвазири Ҷумҳурии Тоҷикистон Ҳоким Холиқзода ва Ноиби Президенти Бонки Ҷаҳонӣ оид ба Аврупо ва Осиёи Марказӣ Антонелла Бассанӣ баргузор гардид. Дар ин бора аз Вазорати молияи Ҷумҳурии Тоҷикистон хабар доданд.

Ҷонибҳо самтҳои асосии ҳамкориҳои кунунӣ ва оянда, аз ҷумла татбиқи лоиҳаҳои мавҷуда дар бахшҳои ислоҳоти иқтисодӣ, идоракунии молияи давлатӣ, рушди устувор, иқтисодиёти рақамӣ ва энергетикаро баррасӣ карданд.

Таваҷҷуҳи хоса ба раванди Амалиёт оид ба сиёсати рушд, ки ба беҳтар намудани фазои сармоягузорӣ, баланд бардоштани шаффофият ва самаранокии идоракунии молиявӣ ва таҳкими воситаҳои макроиқтисодии кишвар нигаронида шудааст, зоҳир гардид.

Яке аз нуктаҳои марказии вохӯрӣ баррасии масъалаи омодасозии Чаҳорчӯбаи нави шарикии кишвар (CPF) байни Ҷумҳурии Тоҷикистон ва Бонки ҷаҳонӣ барои солҳои 2026-2030 буд. Зарурати таҳлили ҳамаҷонибаи афзалиятҳои кишвар бо дарназардошти чунин соҳаҳо, аз қабили таъсиси ҷойҳои нави корӣ, рушди сармояи инсонӣ, рақамикунонӣ ва баланд бардоштани устуворӣ ба тағйирёбии иқлим таъкид гардид.

Антонелла Бассанӣ омодагии Бонки Ҷаҳониро барои идомаи дастгирии ҳамаҷониба аз Тоҷикистон, аз ҷумла ширкат дар ташаббусҳои минтақавӣ ва таҳияи платформаҳои нави ҳамгироии иқтисодӣ ва рушди устувор изҳор дошт.

ДАР СУРАТ: Вазорати молияи Точикистон