Душанбе, 15 сентябр, – АИ «Корвон Иттилоот». Вазири кишоварзии Ҷумҳурии Тоҷикистон Курбон Ҳакимзода бо Сафири фавқулодда ва мухтори Ҷумҳурии Мардумии Чин дар Тоҷикистон Го Ҷицзюн мулоқот анҷом дод, ки ба масоили тақвияти ҳамкории муассисаҳои кишоварзии ду кишвар равона шуд.

Мавзуи асосии гуфтушунидҳо таъмини амнияти озуқаворӣ ва суръат бахшидани татбиқи Ёддошти тафоҳум оид ба ҳамкорӣ дар соҳаи аграрӣ буд. Ҷонибҳо инчунин масъалаҳои тақвияти потенсиали санадҳои дуҷониба ва афзоиши ҳаҷми тиҷорати маҳсулоти кишоварзиро баррасӣ карданд.

Таваҷҷуҳи махсус ба тайёр намудани мутахассисони баландихтисос барои соҳа ва густариши ҳамкорӣ дар самтҳои чорводорӣ, парандапарварӣ, моҳипарварӣ ва абрешимпарварӣ равона гардид.

Вазорати кишоварзӣ таъкид кардааст, ки тақвияти ҳамкории Тоҷикистон бо Чин шароити мусоид барои рушди устувори соҳаи аграрӣ ва баланд бардоштани амнияти озуқавории кишварро фароҳам меорад.

АКС: Вазири кишоварзии Ҷумҳурии Тоҷикистон