Душанбе, 30 октябр, – АИ «Корвон Иттилоот».  Дар шаҳри Душанбе ҷаласаи нахустини Комиссияи муштараки Тоҷикистону Қирғизистон оид ба масъалаҳои ҳамкории об баргузор гардид. Комиссия бар асоси созишномаи байниҳукуматӣ, ки моҳи марти соли 2025 имзо шуда буд, таъсис ёфтааст.

Ҳайати Тоҷикистонро директори Агентии мелиоратсияи замин ва обёрӣ Зафарбек Давлатзода, ва ҷониби Қирғизистонро муовини вазири захираҳои об, кишоварзӣ ва саноати коркард Алмаз Жееналиев роҳбарӣ намуданд.

Дар ҷаласа ҷонибҳо оинаи кори Комиссия, самтҳои ҳамкорӣ ва афзалиятҳои амалиро баррасӣ намуданд.

Таваҷҷуҳи махсус ба масъалаҳои ҷалби сармоя барои таҷдиди иншооти гидротехникӣ дар минтақаҳои наздисарҳадӣ, тақсими одилонаи захираҳои обӣ ва баланд бардоштани самаранокии истифодаи об зоҳир карда шуд.

Бар асоси тавофуқ, ҷаласаҳои Комиссия соле ду маротиба — навбат ба навбат дар ҳар ду кишвар баргузор хоҳанд шуд.

Таъсиси Комиссия ба густариши ҳамкории байнидавлатӣ дар идоракунии захираҳои обии сарҳадгузар, таҳкими эътимод ва ҳамоҳангсозии амалҳо дар соҳаи обу энергетика равона шудааст.

Ҳадафҳои асосии Комиссия иборатанд аз таъмини дастрасӣ ба иншооти обӣ ва энергетикӣ, ҳамоҳангсозии реҷаҳои истифодаи обанборҳо, ва пешгирии эҳтимолии ихтилофҳо дар масъалаи тақсими об.

Тоҷикистон ва Қирғизистон, ки соҳиби ҳавзаҳои обии муштарак мебошанд, солҳо боз дар соҳаи танзими ҷараёни дарёҳо, обёрӣ ва истеҳсоли неруи барқ ҳамкорӣ доранд. Таъсиси ин Комиссия қадами муҳим дар таҳкими ҳамкории институтсионалӣ буда, ба идоракунии устувори захираҳои обӣ ва манфиати муштараки ҳар ду давлат нигаронида шудааст.

АКС: Азия Плюс