Душанбе, 08 декабр, – АИ «Корвон Иттилоот». 4 декабр дар шаҳрии Вена, дар ҳошияи ҷаласаи 32-юми Шӯрои вазирони корҳои хориҷии Созмони Амният ва Ҳамкории Аврупо (САҲА), мулоқоти Вазири корҳои хориҷии Тоҷикистон Сироджиддин Муҳриддин бо Вазири корҳои хориҷӣ ва тиҷорати хориҷии Маҷористон Петер Сийярто баргузор гардид.

Зимни мулоқот ҷонибҳо доираи васеи масъалаҳои ҳамкории дуҷонибаро баррасӣ карданд — аз робитаҳои сиёсӣ ва иқтисодиву тиҷоратӣ то рушди барномаҳои муштарак дар соҳаи маориф. Ҳамзамон ҳамкории Тоҷикистон бо Иттиҳоди Аврупо, муносибатҳои бисёрҷониба дар доираи созмонҳои байналмилалӣ ва масъалаҳои амнияти минтақавӣ, аз ҷумла вазъ дар Афғонистон, муҳокима гардиданд.

Музокирот омодагии ду кишварро барои тавсеаи ҳамкорӣ ва татбиқи ташаббусҳои нави муштарак таъкид намуд.

Дар поёни мулоқот роҳбарони ниҳодҳои сиёсати хориҷӣ Меморандуми аҳдномаро оид ба Стипендияи донишҷӯёни Тоҷикистон дар доираи барномаи стипендияҳои Маҷористон барои солҳои 2026–2028 имзо карданд.

Бар асоси ин ҳуҷҷат, ба донишҷӯёни тоҷик имкони таҳсил дар донишгоҳҳои пешбари Маҷористон бо дастгирии молиявии тарафи маҷорӣ фароҳам мегардад. Ин иқдом имкониятҳои ҷавонони тоҷикро барои дарёфти таҳсили босифати аврупоӣ васеъ намуда, ба рушди нерӯи илмӣ-таҳсилотии кишвар мусоидат мекунад.

Имзои меморандум марҳалаи муҳим дар таҳкими ҳамкории таълимии ду кишвар ба шумор рафта, робитаҳои инсондӯстона ва шарикии дарозмуддатро боз ҳам таҳким мебахшад.Акс: Вазорати корҳои хориҷии Тоҷикистон