Душанбе, 21 декабр, 2025 – АИ «Корвон Иттилоот».  19 декабр дар шаҳри Токио, дар доираи сафари расмии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, Форуми тиҷоратӣ-сармоягузории «Тоҷикистон – Ҷопон» баргузор гардид. Дар он зиёда аз 70 намояндаи мақомоти давлатӣ, доираҳои соҳибкорӣ, ниҳодҳои сармоягузорӣ ва молиявии ҳарду кишвар иштирок намуданд.

Форум идомаи мантиқии фаъолшавии муколамаи Тоҷикистону Ҷопон ба шумор меравад, ки дар солҳои охир тадриҷан аз ҳамкории техникӣ ва башардӯстона ба сатҳи ҳамкории иқтисодӣ ва сармоягузорӣ мегузарад.

Дар маросими ифтитоҳи расмии форум Вазири рушди иқтисод ва савдои Ҷумҳурии Тоҷикистон Абдураҳмон Абдураҳмонзода, Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Султон Раҳимзода ва муовини иҷроияи Президенти Созмони ҷопонии рушди савдои хориҷӣ — JETRO Такафуми Судзуки суханронӣ карданд.

Дар суханрониҳо таъкид шуд, ки Тоҷикистону Ҷопон дорои иқтидори назаррас, вале то ҳол пурра истифоданашудаи ҳамкории иқтисодӣ мебошанд. Зарурати гузариш аз лоиҳаҳои ҷудогона ба шарикии муназзами сармоягузорӣ ҳамчун вазифаи муҳим арзёбӣ гардид.

Барои доираҳои соҳибкорӣ ва сармоягузории Ҷопон имкониятҳои сармоягузории Ҷумҳурии Тоҷикистон ба таври муфассал муаррифӣ карда шуданд. Директори генералии Корхонаи воҳиди давлатии «Тоҷинвест» Дилшод Ҷӯразода бо рӯнамоӣ дар мавзуи муҳити сармоягузорӣ ва механизмҳои амалии дастгирии соҳибкорӣ дар Тоҷикистон баромад намуд.

Дар ҷараёни муаррифӣ ба масъалаҳои ҷалби сармояи мустақими хориҷӣ, рақамисозии иқтисод, рушди энергетикаи «сабз» ва дурнамои шарикии давлат ва бахши хусусӣ таваҷҷуҳи махсус зоҳир гардид. Зикр шуд, ки маҳз ин самтҳо заминаи рушди устувори дарозмуддати иқтисоди Тоҷикистонро ташкил медиҳанд ва ба манфиатҳои стратегии соҳибкории ҷопонӣ мутобиқанд.

Иштирокчиёни форум таъкид карданд, ки бо вуҷуди тамоюли мусбати рушди муносибатҳои дуҷониба, байни Тоҷикистону Ҷопон ҳанӯз ҳам иқтидори истифоданашудаи назаррас, бахусус дар соҳаҳои савдо, ҳамкории саноатӣ ва ҷалби сармоя мавҷуд аст.

Дар ин замина, густариши минбаъдаи ҳамкории иқтисодӣ ба манфиати ҳарду ҷониб арзёбӣ гардид. Зикр шуд, ки Ҷумҳурии Тоҷикистон барои сармоягузорони хориҷӣ шароити мусоиди иқтисодӣ фароҳам оварда, ба рушди ҳамкории мутақобилан судманд ва шарикии созанда бо ширкатҳои ҷопонӣ манфиатдор мебошад.

Форум инчунин ба майдони муколамаи мустақим байни намояндагони бахши хусусӣ ва сохторҳои соҳавии ду кишвар табдил ёфт. Иштирокдорон самтҳои мушаххаси ҳамкории минбаъдаро баррасӣ намуда, табодули афкор ва робитаҳои корӣ анҷом доданд.

Дар анҷоми кори форум байни намояндагони бахши хусусӣ ва ниҳодҳои соҳавии Тоҷикистону Ҷопон якчанд санади ҳамкорӣ ба имзо расид, ки ба чорабинӣ мазмуни амалӣ бахшид.

Баргузории Форуми тиҷоратӣ-сармоягузории «Тоҷикистон – Ҷопон» дар Токио паёми муҳим ба доираҳои соҳибкории Осиёи Шарқӣ дар бораи омодагии Тоҷикистон ба густариши ҳамгироии иқтисодӣ дар сатҳи минтақавӣ ва ҷаҳонӣ гардид. Ин форум нишон дод, ки Душанбе Ҷопонро на танҳо ҳамчун шарики анъанавии рушд, балки ҳамчун сармоягузори стратегии эҳтимолӣ дар бахшҳои калидии иқтисоди миллӣ арзёбӣ мекунад.

АКС: Вазорати рушди иқтисод ва савдои Ҷумҳурии Тоҷикистон