АФҒОНИСТОН, 28 декабри соли 2025 — Агентии иттилоотии Karavan Info. Толибон иддао доранд, ки нақшаи панҷсоларо барои идоракунии захираҳои оби Афғонистон таҳия кардаанд, ки сохтмони сарбандҳои калон, мустаҳкамкунии соҳили дарё ва каналҳоро дар бар мегирад.
Матиуллоҳ Обид, сухангӯи Вазорати энергетика ва захираҳои оби Толибон, ба як радиои маҳаллӣ гуфт, ки ин нақша барои панҷ соли оянда тарҳрезӣ шудааст ва лоиҳаҳои гуногунро барои идоракунии оқилонаи захираҳои оби кишвар дар бар мегирад.
Ӯ инчунин хабар дод, ки корҳои тадқиқотӣ ва тарҳрезии сарбанди Шатут дар вилояти Кобул ба анҷом расидаанд ва айни замон омодагӣ барои оғози татбиқи амалии лоиҳа идома дорад.
Ба гуфтаи ӯ, барои сохтмони сарбанд тақрибан як миллиард афғонӣ буҷа ҷудо шудааст. Пас аз анҷоми сохтмон, он тақрибан чор миллион сокини Кобулро бо оби нӯшокӣ таъмин мекунад ва тақрибан 1800 гектар заминҳои кишоварзиро обёрӣ мекунад.
Созмонҳои байналмилалии башардӯстона ахиран пайваста бонги хатар мезананд ва қайд мекунанд, ки Афғонистон бо хушксолии густурда рӯбарӯ аст. Норасоии об аллакай ба ҳаёти аҳолӣ ва бахши кишоварзӣ дар бисёр минтақаҳои кишвар таъсири манфӣ мерасонад.
Акс: Мустақил (форсӣ)