Душанбе, 24 ноябр, – АИ Корвон Иттилоот. Дар Душанбе Меморандум оид ба тафоҳум ва рушди ҳамкорӣ миёни Кумитаи андоз дар назди  Ҳукумати Ҷумҳурии Тоҷикистон ва Бонки Рушди Евразия (ЕАБР) имзо шуд, ки заминаи ҳамкорӣ барои рушди трансформатсияи рақамӣ ва лоиҳаҳои интегратсионӣ дар соҳаи андозро фароҳам меорад.

Меморандумро аввалин муовини раиси Кумитаи андоз Аюбҷон Солехзода ва муовини раиси Шӯрои директорони Бонки Рушди Евразия Тигран Саркисян имзо карданд.

Ба гуфтаи Аюбҷон Солехзода, ҳамкорӣ ба ҷорӣ намудани воситаҳои рақамии пешрафта дар кори мақомоти андоз, баланд бардоштани самаранокии хизматрасониҳои давлатӣ, тақвияти иқтидори тарафҳо ҳамчун марказҳои дониши рақамисозӣ ва амалӣ намудани лоиҳаҳои интегратсионӣ байни кишварҳои узви Бонки Рушди Евразия равона шудааст.

Муовини раиси Шӯрои директорони Бонки Рушди Евразия Тигран Саркисян таъкид намуд, ки имзои Меморандум имкониятҳои навро барои баланд бардоштани шаффофияти низоми андоз, осон кардани равобити субъектҳои иқтисодӣ, табодули таҷриба миёни кишварҳои фазои Евразия ва таъсиси низоми иттилоотии муосири андоз фароҳам меорад.

Ҳамкорӣ бо Бонки Рушди Евразия ба тақвияти инфрасохтори рақамӣ, иқтидори институционалӣ ва ҳамгироии Тоҷикистон дар равандҳои иқтисодии Евразия мусоидат намуда, самаранокии мақомоти давлатӣ ва рушди иқтисоди кишварро афзоиш медиҳад.

АКС: АМИТ “Ховар”