Душанбе, 13 сентябр, – АИ «Корвон Иттилоот».  Дар рӯзи анҷомии чемпионати Осиё оид ба дзюдо миёни наврасон дастаи Тоҷикистон боз як бори дигар худро ба таври шоиста муаррифӣ кард. Ду варзишгари кишвар — Рошид Неъватов ва Бобоҷон Шаропов — ба финал баромаданд ва миёни ҳам Ҷоми асосиро дар вазни то 73 кг тақсим карданд.

Ҳарду паҳлавон бо ғалабаҳои пайдарпай бар рақибони худ аз кишварҳои гуногун ба марҳилаи ҳалкунанда роҳ ёфтанд. Дар финал тамошобинон шоҳиди муҳорибаи нодир шуданд — финале, ки пурра тоҷикӣ буд.

Дар задухурди ҳалкунанда Рошид Неъватов пирӯзӣ ба даст оварда, унвони қаҳрамони Осиё миёни наврасон ва медали тиллоро соҳиб шуд. Ҳамватанаш Бобоҷон Шаропов бошад, бо нишони нуқра сарфароз гашт.

Ин дастовард идомаи натиҷаҳои баландтари мунтахаби Тоҷикистон гардид. Қаблан, дар рӯзи аввал, Мадина Қурбонзода низ барои кишвар медали тилло ба даст оварда буд, ки ҷойгоҳи Тоҷикистонро дар ҷадвали умумӣ боз ҳам мустаҳкам кард.

Акс: ТВ «Варзиш»