Душанбе, 22 декабри соли 2025 – Хабаргузории иттилоотии Karavan Info. Ҳунармандони байналмилалӣ ва меҳмонони Фестивали сӯзани Панҷакент дар Маркази фарҳангии Олим Бобоев ҷамъ омаданд, то намунаҳои беназири ҳунарҳои мардумиро аз кишварҳои иштирокчӣ бубинанд.

Раиси Шӯрои байналмилалии ҳунармандон Саъд ал-Қаддумӣ ва ҳайати ҳамроҳи ӯ дар баробари роҳбарони гурӯҳҳои ҳунарӣ, муовини раиси вилояти Суғд Ҷамшед Ҷӯразода ва шаҳрдори шаҳр Абдухолиқ Холиқзода даҳҳо намоишгоҳи ҳунарҳои мардумиро аз Тоҷикистон, Узбакистон, Қазоқистон, Эрон, Қирғизистон, Ҳиндустон, Русия, Туркия, Озарбойҷон, Булғористон ва дигар кишварҳо тамошо карданд.

Меҳмонон махсусан кулолгарӣ, заргарӣ, қолинбофӣ, гулдӯзӣ, бофандагӣ, ороишоти миллӣ, расмкашӣ, асбобҳои мусиқӣ, оҳангарӣ, кордсозӣ ва сабадбофиро қайд карданд.

Таваҷҷӯҳи махсус ба асарҳои рассоми Панҷакент Зиёвиддини Нақшбанд, ки бо истифода аз пояҳои гандум портретҳои шахсиятҳо ва рӯйдодҳои таърихиро меофарад, ҷалб карда шуд.

Иштирокчиёни намоишгоҳ таъкид карданд, ки чунин чорабиниҳо ба мубодилаи таҷриба, рушди ҳамкорӣ, эҳё ва таблиғи ҳунарҳои мардумӣ, васеъ кардани бозори маҳсулот ва таҳкими дӯстии байни халқҳо мусоидат мекунанд.

АКС: Мақомоти иҷроияи ҳокимияти маҳаллии шаҳри Панҷакент