Апрел ойи охирида Тожикистон Республикаси Бош вазирининг биринчи ўринбосари Ҳоким Холиқзода Корея Республикасининг Фавқулодда ва Мухтор элчиси Квон Дон Сок билан учрашди.

Томонлар савдо-иқтисодий ва сармоявий ҳамкорликни кенгайтириш ва янада ривожлантириш масалаларини муҳокама қилдилар.

Учрашув иштирокчилари Тожикистон Республикаси ҳудудида тўлиқ циклли пахта толаси, қуёш батареялари, аккумуляторлар, электромобиллар ишлаб чиқариш бўйича қўшма корхоналар ташкил этиш, шунингдек, яшил иқтисодиёт лойиҳаларини амалга ошириш, рақамлаштириш лойиҳалари ва технопаркларни ташкил этиш масалаларига алоҳида эътибор қаратдилар. Шунингдек, савдони осонлаштириш ва «Электрон тижорат» тизимини жорий этиш масалалари кўриб чиқилди.