Shavkat Mirziyoyevga maktabgacha va maktab ta’limini rivojlantirish rejalari taqdim etildi. So‘nggi yillarda ushbu sohalarga e’tibor sezilarli darajada ortmoqda: yangi muassasalar qurilmoqda, zamonaviy usullar joriy etilmoqda, o‘qituvchilarning malakasi oshirilmoqda.

Ilg‘or xorijiy tajribalardan faol foydalanib, maktabgacha ta’lim yangi bosqichga ko‘tarilmoqda. Mamlakatimizda bog‘chalar soni sakkiz barobar ko‘payib, 38 mingtaga yetdi, bolalarni maktabgacha ta’lim bilan qamrab olish darajasi 27 foizdan 76 foizgacha o‘sdi.

Maktab ta’limi ham shiddat bilan rivojlanmoqda. So‘nggi yetti yil ichida 5 mingdan ziyod maktabda, 2024-yilda esa 608 ta maktabda qurilish va ta’mirlash ishlari amalga oshirildi. Ilk bor 530 ta maktabda inklyuziv ta’lim joriy etildi.

Maktabgacha va maktab ta’limi vaziri 2025-yilga mo‘ljallangan rejalar haqida ma’lumot berdi. Mamlakatda 100 dan ortiq maktab qurilib, 257 ming yangi o‘quvchi o‘rni yaratiladi. O‘quv dasturlari xalqaro standartlarga moslashtiriladi. Ikkinchi chet tili o‘rganiladigan maktablar va kasb-hunarga o‘qitadigan ta’lim muassasalari ko‘proq o‘quvchilar uchun imkoniyat yaratadi.

Joriy yilda 1,5 mingta maktabda joriy etilgan yangi baholash tizimini kengaytirish rejalashtirilmoqda. Malaka imtihonlaridan o‘tgan o‘qituvchilarga lavozim maoshining 70 foizigacha ustama haq beriladi. Ularning mahoratini oshirish maqsadida virtual laboratoriyalarga ega zamonaviy pedagogik ta’lim markazlari ochiladi.

Ta’lim va tarbiya jarayonlarining uyg‘unligiga alohida e’tibor qaratilgan. Yuqori sinflarda harbiy-vatanparvarlik tarbiyasi soatlari ko‘paytirilib, ushbu yo‘nalishdagi o‘qituvchilarga harbiy unvonlar beriladi. Yangi o‘quv yili boshlanishidan oldin ushbu fanlar bo‘yicha yangilangan darsliklar tayyorlanadi, 208 ta maktabda «Jasorat maktablari» maxsus sinflari tashkil etiladi.