Qirg‘iziston musulmonlari idorasi “Taba” mas’uliyati cheklangan jamiyati ko‘magida 25 nafar imomni muqaddas Madina shahriga arab tilini o‘rganish bo‘yicha qisqa muddatli kurslarga yuboradi. Bu haqda muftiylik matbuot xizmati xabar berdi.

Sayohat doirasida din arboblari nafaqat arab tilidagi bilimlarini oshiribgina qolmay, balki Madinaning tarixiy qadamjolarini ziyorat qilib, umra ziyoratini ado etadilar.

Xayrlashuv marosimida Qirg‘iziston Respublikasi Prezidenti huzuridagi Din ishlari va millatlararo munosabatlar milliy agentligining ekspertiza va diniy tashkilotlar bilan hamkorlik bo‘limi boshlig‘i Aybek Iminov so‘zga chiqib, ishtirokchilarga o‘quv mashg‘ulotlari muvaffaqiyatli o‘tishini va yo‘l barakotli bo‘lishini tiladi. Muftiylik xodimi Ravshan oji Eratov “Taba” shirkati bosh direktori doktor Abdul-Iloh al-Musharrafga o‘z minnatdorchiligini bildirib, imom-xatiblarni har bir daqiqadan unumli foydalanishga chaqirdi.

Tadbir Qirg‘iziston Islom universiteti majlislar zalida bo‘lib o‘tdi. Unda KIU prorektori Abdivasi oji Matraimov, arab tili o‘qituvchisi Amin Fathiy, muftiylik vakillari hamda respublikaning 7 viloyati va 2 shahridan test sinovlari natijalariga ko‘ra tanlangan imom-xatiblar ishtirok etdi. Ular yaqin kunlarda Madinaga uchib ketishadi.