Алматыда Қозоғистон Республикаси Мудофаа вазирлиги тинчликпарварлик операциялари маркази негизида Марказий Осиё мамлакатлари ҳарбий тиббиёт ходимларининг портловчи моддаларни йўқ қилиш операцияларини тиббий қўллаб-қувватлаш соҳасидаги малакасини оширишга қаратилган минтақавий курс бошланди.

ЕХҲТ нинг Душанбедаги дастурий ваколатхонаси томонидан Қозоғистон Республикаси Мудофаа вазирлигининг қурол назорати ва инспекцияси маркази билан ҳамкорликда ташкил этилган ушбу курс экстремал шароитларда биринчи ёрдам кўрсатиш учун зарур бўлган назарий билимларни ҳам, амалий кўникмаларни ҳам қамраб олади. Миналарни тозалаш операцияларига хос бўлган ностандарт вазиятларда ҳаракатларни ишлаб чиқишга алоҳида эътибор берилади.

Курс дастури халқаро стандартларни ҳисобга олган ҳолда ишлаб чиқилган ва реал шароитларга имкон қадар яқин. Курс иштирокчилари нафақат назарий жиҳатларни ўрганадилар, балки Қозоғистон Республикаси Мудофаа вазирлиги ҳарбий тиббиёт маркази базасида амалий кўникмаларни ҳам қўллайдилар.

Ушбу курс минтақадаги ҳарбий хизматчиларнинг хавфсизлиги ва тезкор тайёргарлигини ошириш, Марказий Осиё мамлакатлари ўртасидаги ҳамкорликни мустаҳкамлашга ҳисса қўшишда муҳим қадам ҳисобланади.

Сурат: ҚР МВ