O‘zbekiston Qishloq xo‘jaligi vazirligida zanglamaydigan metall va qishloq xo‘jaligi texnikasi ishlab chiqarishga ixtisoslashgan Amerika kompaniyasi Paul Mueller Company vakillari bilan uchrashuv bo‘lib o‘tdi. Tashrifning asosiy maqsadi mamlakat sut sanoatini zamonaviylashtirish va uning samaradorligini oshirish imkoniyatlarini muhokama qilish edi.

Paul Mueller Company vakillari rivojlangan sut sanoati va qulay mintaqaviy joylashuvni hisobga olgan holda, O‘zbekistonni biznes yuritish uchun strategik muhim maydon sifatida ko‘rib, qiziqish bildirdilar. Kompaniya mahalliy sut mahsulotlari ishlab chiqaruvchilari va qayta ishlash korxonalari bilan hamkorlikni yo‘lga qo‘yishni, shuningdek, qishloq xo‘jaligi va sut sanoati texnikasini ishlab chiqarishni boshlashni rejalashtirmoqda.

Tomonlar O‘zbekistonning sut mahsulotlari, shuningdek, meva va sabzavotlarni qayta ishlash sohasidagi salohiyati haqida fikr almashdilar. Muzokaralar natijasida ushbu sohalarda hamkorlikni rivojlantirish bo‘yicha aniq takliflar ishlab chiqishga kelishib olindi.

1940-yilda AQShning Springfild shahrida tashkil etilgan Paul Mueller kompaniyasi Niderlandiya, Vyetnam va boshqa mamlakatlarda ishlab chiqarish va savdo faoliyatini olib bormoqda.