O‘zbekiston Prezidenti Andijon davlat texnika institutini tashkil etish to‘g‘risidagi farmonni imzoladi. Yangi oliy o‘quv yurti uchta ta’lim muassasasi negizida tashkil etiladi: Andijon mashinasozlik instituti, Andijon iqtisodiyot va qurilish instituti hamda Toshkent to‘qimachilik va yengil sanoat instituti Andijon fakulteti.

Institut avtomobilsozlik, elektrotexnika, energetika, to‘qimachilik, mashinasozlik va qurilish sohalari uchun mutaxassislar tayyorlaydi. Uning asosiy vazifasi viloyatni zamonaviy bilim va amaliy ko‘nikmalarga ega malakali kadrlar bilan ta’minlashdan iborat bo‘ladi.

2025/2026 o‘quv yilidan boshlab oliy ta’lim dasturlari energetika, sun’iy intellekt, mexatronika va robototexnika yo‘nalishlarini o‘z ichiga olgan holda kengaytiriladi. Shuningdek, talabalar bilimini va o‘qituvchilar ishini baholash uchun xalqaro standartlarni joriy etish rejalashtirilmoqda.

Iqtidorli talabalarning bakalavriat va magistraturadagi ta’limi chet tillarda o‘qitiladigan alohida guruhlarda tashkil etiladi. Bundan tashqari, talabalar tashkiliy masalalarni hal qilish uchun “yagona darcha” tizimidan foydalanish imkoniyatiga ega bo‘ladi.

Birlashtirilayotgan uchta oliy o‘quv yurtining hozirgi barcha talabalari o‘qishni yangi institutda davom ettiradi. 2024/2025 o‘quv yilidan boshlab magistratura bitiruvchilari Andijon davlat texnika institutining diplomlarini oladi.