AQSh prezidenti Donald Tramp davlat xarajatlarini umumiy qiymati qariyb 9 milliard dollarga qisqartirishni nazarda tutuvchi qonunni ma’qulladi, deb xabar berdi Oq uy matbuot xizmati.

Ilgari Kongress tomonidan ma’qullangan hujjat AQSh Davlat departamentiga Xalqaro taraqqiyot agentligi (USAID) faoliyati uchun avval ajratilgan 7,9 milliard dollarni federal byudjetga qaytarishga, shuningdek, NPR (Milliy jamoatchilik radiosi) va PBS (Jamoat eshittirish xizmati) tomonidan qo‘llab-quvvatlanadigan Jamoat eshittirish korporatsiyasini moliyalashtirishga yo‘naltirilgan 1,1 milliard dollarni qaytarish imkonini beradi. Bu miqdor korporatsiyaning ikki yillik byudjetiga deyarli teng.

Donald Tramp 4-iyun kuni Kongressga ushbu xarajatlarni bekor qilish soʻrovini yubordi. NPR butun mamlakat boʻylab 797 ta radiostansiyani, PBS esa 354 ta notijorat telestansiyani, shu jumladan chekka va qishloq joylarda ham birlashtirgan.

Avvalroq The Washington Post xabar qilganidek, Tramp ma'muriyati Davlat departamentini moliyalashtirishni sezilarli darajada – deyarli yarmiga qisqartirishni rejalashtirmoqda. Xalqaro tashkilotlar, jumladan, BMT, NATO va 20 ga yaqin boshqa institutlarni qo‘llab-quvvatlash 90 foizga qisqartirilishi kutilmoqda. Shuningdek, tinchlikparvar missiyalarni moliyalashtirishni to‘xtatish haqida gap ketmoqda.

Qonun loyihasi Senatda keng qo‘llab-quvvatlanganiga qaramay, ayrim respublikachi qonunchilar Oq uydan bunday qisqartirishlarning muayyan dasturlarga ta’siri haqida aniq ma’lumotlar yo‘qligini ta’kidlab, shartlar bilan ovoz berdi.

Eng bahsli masalalardan ikkitasi global OITSga qarshi kurash va favqulodda ogohlantirishlar va muhim ma'lumotlarni taqdim etish uchun foydalaniladigan chekka hududlardagi ommaviy eshittirishlarni moliyalashtirish bilan bog'liq. Qonunning yakuniy versiyasi Prezidentning OITSga yordam berish bo'yicha Favqulodda Rejasiga (PEPFAR) 400 million dollar qisqartirishni bekor qildi va Amerika qishloqlarida jamoat radiosi va televideniyesini qo'llab-quvvatlash uchun qo'shimcha mablag' topishga va'da berdi.

Shuningdek, avvalroq AQSh Davlat departamenti tuzilmaviy o‘zgarishlar, jumladan, xodimlarni qisqartirish va inson huquqlari va xalqaro tashkilotlarni nazorat qiluvchi bir qator departamentlarni tugatishga tayyorgarlik ko‘rayotgani xabar qilingan edi. Ushbu o'zgarishlar joriy yilning 1 oktyabriga qadar amalga oshirilishi kerak.