Jizzaxda to‘rt kun davom etgan kattalar o‘rtasidagi dzyudo bo‘yicha O‘zbekiston birinchiligi yakuniga yetdi. Keskin bellashuvlar natijasida Qashqadaryo viloyati jamoasi umumjamoa hisobida g‘alaba qozondi. Ular 3 ta oltin, 1 ta kumush va 4 ta bronza medalini qo‘lga kiritishdi.

Ikkinchi o‘rinni 2 ta oltin, 6 ta kumush va 2 ta bronza medali bilan Buxoro viloyati jamoasi egalladi. Uchinchi o‘rin xorazmlik dzyudochilarga nasib etdi. Ular 2 ta oltin, 2 ta kumush va 4 ta bronza medalini qo‘lga kiritishdi.

Eng og‘ir vazn toifalarida Islombek Ravshanqulov (erkaklar, +100 kg) va Umida Nigmatova (ayollar, +78 kg) g‘olib bo‘lishdi. Shuningdek, O‘tkirbek To‘raboyev va Javohir Murodullayev (erkaklar, +100 kg) hamda Mohlaroyim To‘xtamisheva va Fotima Quramboyeva (ayollar, +78 kg) sovrindorlar qatoridan joy olishdi.