MARKAZIY OSIYO, 2025-yil 28-iyul – Karavan Info axborot agentligi.Eron ichki ishlar vaziri Eskandar Momeniyning aytishicha, mamlakatda 6 millionga yaqin afg‘on istiqomat qiladi, ulardan 2 millionining yashash guvohnomasi yo‘q.

Uning ta’kidlashicha, o‘tgan yil davomida mamlakatga qaytgan million afg‘on qochqinlarining 70 foizi buni o‘z ixtiyori bilan qilgan.

Vazir, shuningdek, Eron endi yangi qochqinlarni qabul qila olmasligini qayd etdi.

Eron rasmiysiga ko‘ra, BMTning qochqinlar bo‘yicha Oliy komissari va Tolibon vakillari bilan uchrashuv chog‘ida ular afg‘on qochqinlarining qaytishiga yordam bergani uchun Eronga minnatdorchilik bildirgan.

Ayni paytda Tolibon tashqi ishlar vaziri vazifasini bajaruvchi Amir Xon Muttaqiy afg‘on qochqinlarining Erondan to‘satdan ommaviy ravishda chiqarib yuborilishini qo‘pol adolatsizlik va zulm, deb atadi.

Kecha, yakshanba (27-iyul) kuni “Tolibon” harakati matbuot kotibi o‘rinbosari Hamdulloh Fitrat Qochqinlar komissiyasining ish hisobotini taqdim etar ekan, afg‘onlarni mamlakatga qaytarish jarayoni hamon davom etayotganini aytdi.

Foto: IA Karavan Info hamkorlari