O‘zbek milliy san’at markazi «Status‘ning Maqom muzeyi fondi mashhur o‘zbek musiqachisi Faxriddin Sodiqov ijodi bilan bog‘liq qimmatbaho eksponatlar bilan boyidi.

Sodiqov o‘zbek musiqasi rivojlanishiga, xususan O‘zbekiston davlat teleradiokompaniyasi maqom ansambli faoliyatiga salmoqli hissa qo‘shgan bo‘lib, uning rahbarligi ostida ko‘plab ustalar yetishib chiqqan. Uning ansamblda 15 yil davomidagi faoliyati maqomni saqlash va ommalashtirishda muhim bosqich bo‘ldi.

Hozirda Maqom muzeyida Sodiqovning nabirasi Umida Asqarova topshirgan sahna liboslari, faxriy yorliqlar, noyob plastinkalar va tarixiy suratlar saqlanmoqda. Professor Ravshan Yunusov ham musiqachiga tegishli bo‘lgan nodir qo‘lyozmalar va arxiv hujjatlarini topshirdi. Bu eksponatlar uning ijodini o‘rganish va merosini kelgusi avlodlarga yetkazishga xizmat qiladi.

Taxminan 4000 ta eksponatdan iborat kolleksiyaga ega bo‘lgan Maqom muzeyi o‘zbek musiqa san’ati tarixining noyob xazinasidir. Uning eksponatlari orasida musiqa asboblari, kamyob yozuvlar, qo‘lyozmalar va kiyimlar mavjud bo‘lib, bular maqom san’atining boy an’analarini chuqurroq anglashga yordam beradi.