Franklin Templeton tarkibidagi Templeton Global Investments kompaniyasi O‘zbekiston Milliy investitsiya fondining (O‘zNIF) ishonchli boshqaruvchisi etib tayinlandi.

Jamg‘arma 2024-yil avgustda tashkil etilib, uning tarkibiga 18 ta yirik davlat korxonasining minoritar aksiyalar paketlari kiritilgan. Bular orasida “Navoiyazot”, “Hududiy elektr tarmoqlari”, “Issiqlik elektr stansiyalari”, “Xalq banki”, “O‘zbekgidroenergo”, “Mikrokreditbank”, “O‘zbektelekom”, Uzbekistan Airways, Uzbekistan Airports va boshqalar bor. Franklin Templetonning baholashicha, ularning umumiy qiymati taxminan 1,5 milliard dollarni tashkil etadi.

Fondning asosiy vazifalari aktivlarning bozor qiymatini oshirish, xalqaro investorlarni jalb etish hamda aksiyalarni xorijiy fond birjalarida joylashtirish hisoblanadi. Imzolangan shartnomaga ko‘ra, Franklin Templeton investitsiya portfelini boshqarish, korxonalarni transformatsiya qilish dasturlarini amalga oshirish va ularning investitsiyaviy jozibadorligini oshirish bilan shug‘ullanadi. Islohotlardan so‘ng kompaniyalarni fond bozorlariga olib chiqish rejalashtirilmoqda.

Fondning to‘liq faoliyat boshlashi 2025-yil aprel oyida kutilmoqda. 2026-yil oxirigacha uning aksiyalari Toshkent va London birjasi kabi xalqaro birjalarda joylashtiriladi. Belgilangan qoidalarga ko‘ra, 2030-yilgacha fond sof foydasining kamida 50 foizi dividendlarni to‘lashga yo‘naltiriladi.