Хитойлик инвестор Қирғизистондаги “Жунда” нефтни қайта ишлаш заводини модернизация қилиш учун 169 млн. доллар сармоя киритишни режалаштирмоқда. Бу ҳақда НҚЗ Бош директори Хуан Цян Қирғизистон парламенти вице-спикери Нурланбек Азигалиев билан учрашувда айтиб ўтди.
Хуан Цяннинг сўзларига кўра, модернизация 2025 йилгача якунланиши режалаштирилган, аммо у аниқроқ вақт оралиғини аниқламаган. Лойиҳа доирасида компания зарарли моддалар чиқиндиларини камайтириш ва ёқимсиз ҳидларни йўқ қилиш учун ускуналар ўрнатади.
China Petrol Company Junda хитой компанияси 2014 йилда иш бошлаган “Жунда” НҚЗ ни модернизация қилиш учун тахминан $ 300 миллион сармоя киритганлигини эслатиб ўтамиз. Аввалги модернизациядан сўнг заводнинг қуввати йилига 800 минг тоннагача енгил нефть маҳсулотлари ишлаб чиқаришни бошлади.
Сурат: АКИpress