Kitob geologik tabiat bog‘i vakillari Olmaotada o‘tkazilgan “Barqaror rivojlanish va hamkorlik uchun YUNESKOning global geoparklari” nomli xalqaro geoforumda qatnashdi.

Forumda Markaziy Osiyoda YUNESKOning global geoparklarini tashkil etish masalalari muhokama qilindi. Ishtirokchilar tashkilotning talablarini ko‘rib chiqishdi, geologik merosni asrash bo‘yicha tajriba almashishdi va uni muhofaza qilishning dolzarb muammolarini muhokama etishdi.

Mintaqada yuqori salohiyatga ega geoparklarni o‘rganish va yangi geoparklarni barpo etishga mos hududlarni muhokama qilishga alohida e’tibor qaratildi.

Forum dasturiga Qozog‘iston Respublikasining Jambul viloyatida joylashgan “Qoratov” geoparkiga dala safari kiritilgan edi. Ishtirokchilar ushbu hududning noyob geologik obyektlari va o‘ziga xos xususiyatlari bilan tanishdilar.

Forum Markaziy Osiyo mamlakatlari o‘rtasida geologik merosni saqlash va undan foydalanish sohasida tajriba almashish hamda hamkorlikni mustahkamlash uchun muhim maydon bo‘lib xizmat qildi.