Mustaqil Davlatlar Hamdo‘stligi (MDH) Hukumat rahbarlari kengashining Dushanbe shahrida bo‘lib o‘tgan yig‘ilishida MDH ko‘ngillilar forumi to‘g‘risidagi nizom rasman tasdiqlandi. Bu haqda MDH Ijroiya qo‘mitasi matbuot xizmati xabar berdi.

Nizomga ko‘ra, Forum tajriba almashish, ko‘ngillilar harakatini rivojlantirish va xalqaro hamkorlikni mustahkamlash uchun yillik maydonga aylanadi. Tadbirni tashkil etish MDHga a’zo davlatlarning Yoshlar ishlari bo‘yicha kengashi zimmasiga yuklatildi. Forum Hamdoʻstlik mamlakatlarida davlatlar nomlarining rus alifbosi bilan belgilangan tartibda navbatma-navbat oʻtkaziladi.

Forumni tashkil etish tashabbusi 2023-yil oktabr oyida MDH Davlat rahbarlari kengashi yig‘ilishida Qozog‘iston Prezidenti Qosim-Jomart Tokayev tomonidan ilgari surilgan edi. Yoshlar masalalari bo‘yicha kengash taklifni qo‘llab-quvvatladi va Forumni tashkil etish to‘g‘risidagi masalani hukumat rahbarlari muhokamasiga kiritdi.

Forumning asosiy maqsadlari MDH davlatlari ko‘ngilli tashkilotlari o‘rtasida muloqot va o‘zaro hamkorlik platformasini yaratish, ko‘ngillilarning ijtimoiy hayotdagi ishtirokini kengaytirish, volontyorlik faoliyati nufuzini oshirish va bu boradagi muvaffaqiyatli loyihalarni taqdim etishdan iborat.