O‘zbekistonda tog‘ jinslari va minerallarning milliy spektral elektron kutubxonasini yaratish ishlari davom etmoqda. Loyihaning asosiy maqsadi paleozoy yotqiziqlarini 14 ta zonaga ajratish va ularning spektral ma’lumotlarini kelgusida ilm-fan hamda sanoatda foydalanish uchun to‘plashdan iborat.

Dastlabki bosqichda Kon-sanoati va geologiya vazirligi hamda Innovatsion rivojlanish agentligi bilan hamkorlikda Bo‘qontov tog‘larining markaziy qismida o‘rganilgan tog‘ jinslari va minerallarning 400 ta namunasidan iborat ma’lumotlar bazasi yaratildi.

Hozirda Tomditov, Ovminza-Beltov, Shimoliy Nurota va Hisor tog‘ tizmalaridan olingan ma’lumotlar hisobiga kutubxonani kengaytirish ishlari olib borilmoqda. Yaqin kelajakda, ya’ni 2025-2030-yillarda, kutubxonani Sharqiy Bo‘qontov, Sultonuvays, Aristontov-Sangruntov, Qo‘ljuqtov, Chotqol-Qurama va boshqa hududlardan olingan namunalar bilan to‘ldirish rejalashtirilgan.

Spektral kutubxonaning yaratilishi mamlakatimiz mineral resurslarini o‘rganish uchun yangi imkoniyatlar ochadi va ulardan iqtisodiyotda yanada samarali foydalanish imkonini beradi.