O‘zbek meva-sabzavot mahsulotlari tez orada Shvetsiya, Norvegiya va Daniya do‘konlari peshtaxtalarida paydo bo‘lishi mumkin. Eksport bilan shug‘ullanuvchi o‘zbekistonlik tadbirkorlardan iborat delegatsiya ushbu mamlakatlarga tashrif buyurib, mahalliy kompaniyalar va savdo tarmoqlari bilan muzokaralar olib bordi.

O‘zbekiston Respublikasi elchixonasi tashabbusi bilan “Universal Freezen Foods”, “Uzterminal” va “Baltic Shipping” kompaniyalari vakillari “Matvärlden”, “Food Collective Company”, “Alwaid”, “Qlok Bygg AB”, “Exotic Fruits Company” kompaniyalari bilan uchrashib, o‘zbek mahsulotlarini ilgari surish bo‘yicha kelishuvlarga erishdi.

Xususan, quritilgan lag‘mon, muzlatilgan gilos, olxo‘ri, brokkoli, shuningdek, muzlatilgan va qadoqlangan anor, poliz, gilos kabi meva-sabzavotlarni yetkazib berish masalasi muhokama qilindi. Bundan tashqari, Shvetsiya va Norvegiyada savdo uylari (koʻrgazma zallari) tashkil etish rejalashtirilgan.