Ruminiya poytaxti Buxarestda jahon shaxmat elitasini birlashtirgan yilning eng yirik klassik shaxmat turnirlaridan biri “Superbet Chess Classic Romania-2025” boshlandi. Musobaqa mukofot jamg'armasi 350 000 dollarni tashkil qiladi.

Turnirda O‘zbekiston sharafini xalqaro grossmeyster Nodirbek Abdusattorov himoya qilmoqda. Hamyurtimiz ikkinchi davrada yuqori darajadagi tayyorgarlikni namoyish etib, amaldagi jahon chempioni hindistonlik Gukesh Dommarajuga qarshi o‘yinni tenglashtirdi. Ammo uchinchi davrada Nodirbek afsuski, hindistonlik yana bir iqtidorli shaxmatchi Rameshbabu Pragnanandxa bilan o‘tkazgan bahsida ochko ololmadi.

Bugun to‘rtinchi turda Nodirbek Abdusattorovni jiddiy sinov – sayyoramizning eng kuchli shaxmatchilaridan biri, amerikalik grossmeyster Fabiano Karuanaga qarshi o‘yin kutib turibdi.

Superbet Chess Classic Romania-2025 turniri davra tizimida o‘tkaziladi va to‘qqiz turdan iborat. Musobaqa 16 may kuni yakunlanishi rejalashtirilgan.