Michigan Davlat universiteti (AQSh) faxriy professori Stiven Puepke va Osiyo markazi direktori professor Jiaguo Qi O‘sh davlat universitetiga tashrif buyurdi.

Mehmonlarni universitetning o‘quv ishlari bo‘yicha prorektori Ruslan Arapbayev, ilmiy ishlar bo‘yicha prorektor Elzarbek Esharov, reyting bo‘limi boshlig‘i Maqsatom Totobaev va xalqaro aloqalar bo‘limi direktori Saykal Ibraimovalar qabul qildilar. Tomonlar hamkorlik masalalari yuzasidan fikr almashdilar.

Jiaguo Qi O‘sh davlat universitetiga Osiyo markazi doirasida xalqaro ilmiy hamkorlikni rivojlantirish, energetika, oziq-ovqat va suv muammolari bo‘yicha tadqiqotlar olib borish, qo‘shma loyihalar yozish, yirik xalqaro tadbirlarni o‘tkazish takliflari bilan kelganini aytdi.

Ikki oliy o‘quv yurti o‘rtasida hamkorlikni yo‘lga qo‘yish borasidagi ishlar kelgusida ham davom ettirilishiga qaror qilindi. O‘z navbatida mehmonlarga O‘shDU faoliyati haqida ma’lumot berildi.

Michigan Davlat universiteti Qo'shma Shtatlardagi eng yirik va yetakchi davlat universitetlaridan biri hisoblanadi. 50 000 dan ortiq talaba qishloq xo'jaligi, muhandislik, tibbiyot, ekologiya va xalqaro munosabatlar bo'yicha tahsil oladi.

Universitetning Osiyo markazi hamkorlarni aniqlash, birgalikda moliyalashtirish strategiyalarini ishlab chiqish va investitsiyalarni jalb qilish orqali universitetga keng qamrovli tadqiqotlar va yangi akademik dasturlarni ishlab chiqishda yordam beradi.

Markaz hozirda Markaziy Yevroosiyo, Sharqiy, Janubiy va Janubi-Sharqiy Osiyoda oziq-ovqat, qishloq xo‘jaligi, sog‘liqni saqlash, atrof-muhit, suv va energetika sohalarida hamkorlik qiluvchi 27 ta muassasaga ega.