O‘sh shahar hokimining birinchi o‘rinbosari Adilet Sharshenali uulu Buyuk Britaniyaning Qirg‘iziston Respublikasidagi elchixonasi maslahatchisi Charlz Morris bilan uchrashuv o‘tkazdi.

Uchrashuvda ikki tomonlama hamkorlikni mustahkamlash masalalari muhokama qilinib, yashil iqtisodiyot, energetika va bu sohalarda tajriba almashish imkoniyatlariga alohida e’tibor qaratildi.

Tadbirda xotin-qizlarning tadbirkorlikdagi faol ishtirokini ta’minlash, ularni qo‘llab-quvvatlash chora-tadbirlari yuzasidan fikr almashildi. Shuningdek, kommunal xizmatchilarning yashil iqtisodiyot sohasida bilimini oshirish va tajriba orttirish maqsadida maxsus o‘quv tadbirlarini tashkil etish tashabbusi ilgari surildi.

Bundan tashqari, raqamlashtirish, IT-texnologiyalar, aqlli avtoturargohlar va quyosh energiyasidan foydalanish sohasida innovatsion loyihalarni amalga oshirish imkoniyatlari ko‘rib chiqildi.

Uchrashuv yakunlari bo‘yicha tomonlar ko‘rsatilgan yo‘nalishlarda loyihalarni birgalikda amalga oshirish va hamkorlikni yanada chuqurlashtirishga kelishib oldilar.