Prezidentning 2024-yil 22-oktyabrdagi farmoniga ko‘ra, O‘zagroinspeksiyaga don va don mahsulotlari sifatini nazorat qilish vazifasi yuklatildi. Bosh maqsad — g‘allakorlarning moddiy manfaatdorligini oshirish, davlatning g‘alla bozoridagi ishtirokini kamaytirish va iste’molchilarni sifatli mahsulotlar bilan ta’minlashdir.

Bundan tashqari, 2022-yil 28-maydagi qarorga muvofiq, bug‘doy ishlab chiqaruvchilar uchun bozor mexanizmlari joriy etildi. Jumladan, xarid qilingan donning kamida 75 foizini birja savdolari orqali sotish majburiyati kiritildi. Bu ichki bozorni yuqori sifatli un mahsulotlari bilan barqaror ta’minlashga qaratilgan.

Buxoro viloyatining Qorako‘l tumanidagi «Sakinat don mahsulotlari» korxonasida texnologik jarayonni o‘rganish, mahsulot sifatini nazorat qilish va yuzaga kelishi mumkin bo‘lgan kamchiliklarni bartaraf etish bo‘yicha tushuntirish ishlari olib borilmoqda. Korxona belgilangan talablarga javob beradigan zarur quvvatlar va laboratoriyalarga ega bo‘lgan taqdirda bug‘doyni birja savdolarida sotib olishi shart.