O‘zbekiston Ekologiya, atrof-muhitni muhofaza qilish va iqlim o‘zgarishi vazirining o‘rinbosari Jusipbek Kazbekov boshchiligidagi vazirlik delegatsiyasi Parijda IHTTning “Yevroosiyo do‘stlari” guruhi va “GREEN” ishchi guruhi yig‘ilishida ishtirok etdi. Ikki kunlik tadbir Yevroosiyo mamlakatlari va IHTT a’zolari o‘rtasida iqlimni muhofaza qilish va iqtisodiy rivojlanish chora-tadbirlarini uyg‘unlashtirish bo‘yicha tajriba almashish maydoniga aylandi.

J.Kazbekov o‘z nutqida “Atrof-muhitni muhofaza qilish va yashil iqtisodiyot yili” doirasida O‘zbekistonning ustuvor yo‘nalishlarini bayon qildi. Bular shaharlarni ko‘kalamzorlashtirish, yomg‘ir suvidan samarali foydalanish tizimlarini joriy etish, “Yashil makon” va “Mening bog‘im” dasturlari doirasida 200 million tup daraxt ekish, quyosh energetikasini rivojlantirish, Orolbo‘yi mintaqasini tiklash va plastik ifloslanishga qarshi kurashishni o‘z ichiga oladi. U mamlakatning Markaziy Osiyoning barqaror kelajagini shakllantirishda yetakchi rol o‘ynayotganini ta’kidladi.

Yig‘ilishdagi muhokamalar mintaqaning iqlim barqarorligini ta’minlash uchun amaliy islohotlar va yo‘l xaritalarini ishlab chiqishga qaratildi. IHTT vakillari tahliliy materiallarni taqdim etib, raqobatbardoshlikni oshirish va ekologik siyosat dasturlari doirasida to‘plangan tajribalarini baham ko‘rdilar.

Iqlim o‘zgarishining kuchayib borayotgan oqibatlariga — rekord darajadagi harorat, qurg‘oqchilik, muzliklarning tezkor erishi va jiddiy iqtisodiy yo‘qotishlarga sabab bo‘layotgan suv toshqinlariga alohida e’tibor qaratildi. Mutaxassislar ekologik halokatlarning oldini olish uchun shoshilinch choralar ko‘rish zarurligini uqtirdilar.

IHTT tahlillariga ko‘ra, iqlim tashabbuslarini iqtisodiy siyosatga singdirish 2050-yilga kelib global yalpi ichki mahsulotni 2,8 foizga oshirishi mumkin. Markaziy Osiyoda moslashuv choralari aralashuvsiz yiliga yalpi ichki mahsulotning 1,3 foiziga yetishi mumkin bo‘lgan zararning oldini olishga yordam beradi.