O‘zbekiston Migratsiya agentligi Tataristonning qurilish, logistika, avtomobilsozlik, ishlab chiqarish va yo‘lovchi tashish sohalarida faoliyat yuritayotgan yirik kompaniyalari bilan yetti kelishuv imzoladi. Kelishuvlar doirasida 11 ming ish o‘rni yaratilishi ko‘zda tutilgan.

Muzokaralar Tataristonning Qurilish, arxitektura va kommunal xo‘jalik vazirligi hamda respublika Savdo-sanoat palatasida o‘tkazildi. O‘zbekiston tomonining hamkorlari orasida “Apgreyd staff”, “Qozon DSK”, “2-sonli yo‘lovchi avtotransport korxonasi”, “PPT Alabuga”, “KAMAZ” OAJ, “Arteks Stroy Proyekt” va “KZTM” kompaniyalari bor.

Ilgari xabar berganimizdek, O‘zbekiston Tashqi mehnat migratsiyasi agentligi direktori Behzod Musayev Rossiya hududlariga tashrifi chog‘ida “Alabuga” maxsus iqtisodiy zonasiga tashrif buyurib, u yerdagi korxonalarda mehnat qilayotgan 1150 nafar O‘zbekiston fuqarosining ish va turmush sharoitlari bilan tanishgan edi. “Alabuga” rahbariyati bilan olib borilgan muzokaralar natijasida o‘zbekistonlik mutaxassislar uchun 10 ming ish o‘rniga kvota ajratish to‘g‘risida kelishuvga erishildi. Migratsiya agentligi ushbu bo‘sh ish o‘rinlari uchun tanlov e’lon qiladi.