O‘zbekiston terma jamoasi 7-14 fevral kunlari Xitoyning Xarbin shahrida bo‘lib o‘tadigan IX qishki Osiyo o‘yinlarida ishtirok etadi. Bu yil mamlakatimiz jamoasi musobaqalardagi ishtiroki tarixidagi eng ko‘p sonli tarkibga ega bo‘ladi — 24 nafar sportchi oltita sport turi bo‘yicha bellashadi.

O‘zbekiston sharafini short-trek (Daniil Yoybog‘, Denis Ayrapetyanc), konkida uchish (Danila Semerikov), tog‘-chang‘i sporti (Medet Nazarov, Arman Gayupov, Nikita Gorkovskiy, Sabina Rejepova, Valeriya Kovalyova, Kseniya Grigoryeva, Mariya Morozova), ski-alpinizm (Mohinur Aralova, Feruza Boboqulova, E’zoza Shaymardonova, Asila Shoyimova, Jasur Shamsiddinov, Maqsudxon Akobirov, Shohruh Sardorov, E’zozbek Xushvaqtov), figurali uchish (Yekaterina Geynish, Dmitriy Chigiryov, Niginabonu Jamoliddinova, Sevinch Rahimova) va biatlon (Rolan Raimqulov, Dilmurod Abdurahmonov) bo‘yicha himoya qiladi.

Ochilish marosimi 7-fevral kuni bo‘lib o‘tadi, aynan shu kuni o‘zbekistonlik sportchilar o‘z musobaqalarini boshlaydilar.