Kuala-Lumpurda bo‘lib o‘tayotgan ICAO ICAN-2024 tadbirida O‘zbekiston delegatsiyasi Iordaniya vakillari bilan muzokaralar o‘tkazdi. Bu yo‘nalish O‘zbekiston uchun yangi bo‘lib, shu paytgacha mamlakatlar o‘rtasida to‘g‘ridan-to‘g‘ri aviaqatnovlar bo‘lmagan. Bundan tashqari, har ikki tomonga sayohatlarga qiziqish allaqachon namoyon bo‘lmoqda: 2023-yil va 2024-yilning to‘qqiz oyida O‘zbekistonga 2700 dan ortiq Iordaniya fuqarosi, Iordaniyaga esa 5000 ga yaqin O‘zbekiston fuqarosi tashrif buyurgan.

Iordaniya aviatsiya ma’muriyati bilan muzokaralar chog‘ida havo qatnovi to‘g‘risidagi bitimga o‘zgartirishlar kirituvchi bayonnoma imzolandi. Unga ko‘ra, aviakompaniyalar soniga qo‘yilgan cheklovlar olib tashlanadi, bu esa mamlakatlar o‘rtasida tashuvchilarning tanlovini kengaytirish imkonini beradi. Shuningdek, ikki davlat aviatsiya ma’murlari o‘rtasida o‘zaro anglashuv memorandumi imzolandi.

Ushbu bitim ikki tomonlama turizmni, xususan, ziyorat turizmini rivojlantirish uchun imkoniyatlar ochadi. Endilikda O‘zbekiston fuqarolari Iordaniyaning tarixiy obidalari bilan tanishishlari mumkin, iordaniyaliklar uchun esa O‘zbekistonga tashrif buyurish uchun sharoitlar yaratilmoqda.