O‘zbekiston elchisi Alisher To‘xtayev Lahorga tashrifi doirasida Pokistonning “DADA” kompaniyasiga qarashli charm zavodida bo‘ldi. Delegatsiya korxonaning ishlab chiqarish quvvatlari, teriga ishlov berish bosqichlari, mahsulotlar assortimenti va ishlab chiqarish jarayonida qo‘llaniladigan suvni tozalash tizimi bilan tanishdi.

Kompaniya rahbariyati qo‘y va echki terilarini qayta ishlash, oshlash, kimyoviy ishlov berish, bo‘yash, quritish, saralash va eksportga tayyorlash texnologik siklini batafsil taqdim etdi. Bunga javoban O‘zbekiston tomoni respublikadagi investitsiya muhiti, xorijiy investorlar uchun yaratilgan sharoitlar, mavjud imtiyozlar, xomashyo bazasi va istiqbolli bozor haqida taqdimot o‘tkazdi.

Tomonlar qo‘shma sanoat korxonasini tashkil etishni muhokama qilish uchun 2025-yil aprel oyida “DADA” vakillarining O‘zbekistonga tashrifi bo‘yicha kelishuvga erishdilar. Ohangaron va Jizzax erkin iqtisodiy zonalari loyihani amalga oshirish uchun salohiyatli maydonlar sifatida ko‘rib chiqilmoqda.